Abanca converteuse no principal accionista de Nueva Pescanova tras pechar recentemente tres operacións a través das cales adquiriu outros tantos paquetes de títulos equivalentes a un 13,60% do capital de Nueva Pescanova.
Concretamente, segundo informou a entidade bancaria nun comunicado, fíxose cun 7,66% pertencente ao fondo de investimento Oceanwood; un 0,03% de MUFG Bank e un 5,91% que posuía BBVA.
Con estas compras, Abanca eleva a súa participación na empresa pesqueira ata o 30,81% e quintuplica a que tiña ao comezo de 2018.
O incremento da participación de Abanca en Nueva Pescanova durante este ano, sinala a nota, enmárcase na súa política xeral de apoio á economía e a industria galegas, que está orientada á consolidación e crecemento de empresas e sectores claves.
Mediante o seu apoio a Nueva Pescanova, Abanca contribúe a reforzar o complexo industrial relacionado co mar, no que Galicia é unha das comunidades punteiras a nivel internacional.
O comunicado indica que o banco que preside Juan Carlos Escotet destina a ese conxunto de sectores (pesca, conserva e transformación, construción naval, etc.) un investimento crediticio total de 1.373 millóns de euros.
