Alcoa acusa os traballadores de negarse a negociar un plan social
Alcoa remitiuse este martes ao período de 15 días que, segundo indica, ten agora para decidir sobre o proceso de despedimento colectivo na planta de Aluminio de San Cibrao, tras frustrarse a venda a súa venda tanto a Liberty como á Sepi e despois de que "os traballadores se negasen a negociar un plan social".
E é que este luns concluíu o período de consultas para a fábrica sen acordo, logo dunha reunión de case 10 horas convocada pola empresa en Nigrán, a unhas tres horas de A Mariña lucense. "Alcoa ten agora 15 días para tomar unha decisión sobre a planta de aluminio que ten unha capacidade de produción de 228.000 toneladas ao ano", apunta a propia empresa nun comunicado.
Recorda, na nota de prensa, que o 13 de agosto anunciou que aceptara chegar a un acordo cos representantes dos traballadores para estender o período formal de consulta do despedimento colectivo para que a compañía puidese negociar "unha posible venda da planta de aluminio a GFG Alliance".
O período do proceso de negociación completouse posteriormente sen que GFG Alliance e Alcoa chegasen a un acordo sobre os termos de venda.
"DURANTE UN DÍA". Segundo o acordo asinado cos representantes dos traballadores, incide a multinacional, en caso de non chegar a un acordo de venda ao 27 de setembro de 2020 –o pasado domingo–, Alcoa e os representantes dos traballadores reuniríanse "durante un día" para negociar un plan social para un expediente de regulación temporal de emprego (Erte) ou a aplicación dun despedimento colectivo permanente (Ere).
Este luns, advirte, "os representantes dos traballadores negáronse a negociar un plan social e non foi posible un acordo, polo que Alcoa conta agora cun prazo de ata 15 días, conforme á normativa española, para tomar unha decisión en relación ao proceso de despedimento colectivo".
Engade Alcoa que o 25 de xuño iniciou o proceso formal de consulta para estudar un plan de reorganización cos representantes dos traballadores. "O plan, destinado a frear as perdas financeiras persistentes e recorrentes da planta de aluminio, recomendaba a parada das cubas de electrólises e manter en funcionamento unha parte da fundición", subliña.
Sobre o proceso de venda, Alcoa defende negociar "de boa fe", pero insiste en que non pode acordar a venda "en condicións que non sexan razoables". Asegura facer "unha oferta equilibrada para ambas as partes" e "varias concesións para chegar a un acordo".
Pola contra, acusa a GFG de non negociar "dentro do prazo que se comprometeu a cumprir", de negarse "a proporcionar ningún tipo de financiamento para apoiar o futuro da planta" e de insistir "en termos comerciais pouco razoables", incluída a aprobación de calquera venda futura da refinería, o cal está "fóra do alcance do acordo cos representantes dos traballadores do 13 de agosto".
Finalmente, agradece a "predisposición" do Goberno a buscar alternativas ante a "falta de progreso" por parte de GFG Alliance pero afirma que as súas propostas a través da Sepi "inclúen unha serie de cuestións que impiden chegar a un acordo en condicións comerciais razoables; entre elas, aínda que non exclusivamente, a solicitude de dereitos preferentes sobre a refinería".
"Non se pode esixir a Alcoa que achegue máis recursos e financiamento dos que xa se comprometeu a realizar en cantidades importantes neste proceso de venda, nin que acepte condicións fóra de mercado, nin peticións fose do ámbito do acordo cos representantes dos traballadores", reitera a compañía. Neste sentido, conclúe que a refinería de alúmina de San Cibrao "non se incluíu en proceso de consulta nin no de venda".
