A baixada da electricidade intensifica a caída do IPC en outubro ao 0,8 %

En comparación mensual, a inflación subiu un 0,5 % respecto de setembro
O abaratamento da electricidade provocou a caída do IPC en outubro. PIXABAY
photo_camera O abaratamento da electricidade provocou a caída do IPC en outubro. PIXABAY

O índice de prezos de consumo (IPC) caeu en outubro o 0,8 % interanual, catro décimas máis que en setembro, debido ao abaratamento da electricidade, segundo publicou este venres o Instituto Nacional de Estadística (INE).

A caída é unha décima inferior respecto ao 0,9 % adiantado polo INE o pasado 29 de outubro.

Das catro décimas de diferenza entre a taxa de setembro e a de outubro, tres décimas son achacables ao grupo da vivenda, que caeu o 3,6 % pola baixada dos prezos da electricidade.

A outra décima débese ao descenso do 4,2 % do grupo de comunicacións, como consecuencia da diminución dos prezos dos servizos empaquetados de telefonía.

Tamén influíu á baixa, aínda que en menor media, o grupo do ensino, que caeu un 0,2 % a causa do descenso dos prezos do ensino universitario, que subiran en 2019.

Pola contra, tivo unha influencia positiva sobre o índice o grupo do lecer e a cultura, que baixou menos que o mes anterior (0,7 % interanual), porque os prezos dos paquetes turísticos diminuíron este mes menos que o mesmo do ano pasado.

A inflación subxacente (índice xeral sen alimentos non elaborados nin produtos enerxéticos) mantívose en positivo, cunha subida do 0,3 % interanual, aínda que supón unha décima menos respecto da taxa rexistrada o mes anterior.

Desta forma, a subxacente situouse máis dun punto por encima do IPC xeral.

En comparación mensual, o IPC subiu un 0,5 % respecto de setembro, fundamentalmente pola subida do 11,1 % do grupo do vestido e calzado, que recolle o comportamento dos prezos na nova tempada de inverno.

O grupo de alimentos e bebidas non alcohólicas aumentou un 1,4 % mensual pola subida dos prezos das froitas.

A caída anual do IPC aumentou en todas as comunidades autónomas en outubro respecto de setembro, salvo en Canarias.

Canarias foi a única comunidade na que o indicador se mantivo en positivo, xa que subiu un 0,3 %, a mesma taxa que o mes anterior.

A maior diferenza foi para Estremadura, onde o IPC baixou o 0,6 % interanual, fronte á subida do 0,1 % do mes anterior.

Pola súa banda, Murcia foi a comunidade onde a diferenza foi menor, cunha caída do 0,5 %, unha décima máis que en setembro. 

Comentarios