Bioga incentiva a 30 investigadores para que o seu I+D se transforme en negocio
Santiago de Compostela acolleu este xoves a primeira de catro sesións de traballo vinculadas ao Proxecto Merlin
Unha trintena de investigadores galegos procedentes das fundacións biomédicas das tres universidades de Galicia e de startups vinculadas á biotecnoloxía participan nos Biotalleres Merlin, organizados polo Clúster Tecnolóxico Empresarial das Ciencias da Vida (Bioga), que pretenden estimular a transferencia ao mercado dos resultados de investigación.
Santiago de Compostela acolleu este xoves a primeira de catro sesións de traballo vinculadas ao Proxecto Merlin impulsado no marco da Unión Europea e que persegue "cambiar a mentalidade dos investigadores e identificar os produtos ou servizos finais que se poidan desenvolver e chegar ao mercado apoiándose no resultado das súas propias investigacións", segundo Brendan Rowan, socio de BluSpecs, unha das entidades que participa nesta iniciativa.
"Temos que cambiar o chip. Moitas veces os resultados das investigacións quedan no caixón e nós queremos sacalos do caixón e que poidan chegar ao mercado, queremos lograr un resultado final", dixo o experto nun comunicado.
Tamén advirte Rowan que a misión do Programa Merlin "non consiste en converter un investigador nun emprendedor", senón "buscar xente que poida apoiar ao investigador para desenvolver a súa investigación e convertela en negocio. Ensinamos a presentar o valor que ten cada investigación, cada investigador".
Este xoves participaron na sesión unha trintena de investigadores galegos vinculados ás tres universidades que desexan explotar os resultados de I+D en forma de spin-off, patente ou licenza, e tamén líderes de startups vinculadas á biotecnoloxía en Galicia que queren introducir un novo proceso, servizo ou produto no innovador mercado das ciencias da vida.
O socio de BluSpecs recoñece que a obtención de retorno nos investimentos vinculados á biotecnoloxía "precisan de tempo e paciencia". "O investimento nun proxecto vinculado a algún medicamento precisa de dez anos para comezar a obter un retorno se todo vai segundo o previsto", pero subliña que "hai outros modelos de negocio do sector bio e vinculados a internet das cousas que poden xerar negocio en menos dun ano".
Brendan Rowan bota de menos a visión comercial nos investigadores europeos. "En Estados Unidos pensan máis no mercado", afirma, e sinala neste sentido que o Proxecto Merlin incentiva esa cultura de trasladar as investigacións ao mercado, "atraer o mercado ao laboratorio".
