Portugal afronta desde este luns e por tempo indefinido unha nova folga dos transportistas de mercancías perigosas que, a pesar das medidas tomadas os últimos días para preparar o país, terá efectos sobre o abastecemento de combustible.
En Galicia, a folga podería supor que as estacións de servizo fronteirizas con Portugal se visen saturadas ante a avalancha de condutores chegados do país veciño para encher.
O paro chega no medio das vacacións de verán e catro meses logo da anterior folga no sector, que provocou problemas de abastecemento nos aeroportos e o transporte público e deixou gasolineiras secas por todo o país.
Tras meses de negociacións que non chegaron a bo porto, as organizacións convocantes -o Sindicato Nacional de Transportistas de Mercancías Perigosas e o Sindicato Independente dos Transportistas de Mercancías- decidiron o sábado en senllos plenos manter a paralización.
Os sindicatos esixen que a patronal do sector, Antram, cumpra o acordo asinado tras o anterior paro, que recoñece aumentos salariais para os transportistas.
Ante a perspectiva de que a folga non se desconvocase, o Goberno portugués puxo en marcha varias medidas para mitigar os efectos da paralización e evitar que se repita o caos vivido en abril.
"A folga non deixará de afectar ao día a día dos portugueses", recoñeceu o sábado o primeiro ministro, o socialista António Costa, que falou á prensa tras un gabinete de crise con varios membros do seu Executivo para coordinar a resposta á situación.
Por iso, estableceu servizos mínimos do 100% para prioritarios -como aeroportos, portos, servizos de seguridade, bombeiros e urxencias médicas-, do 75 % para transporte público e do 50% para a subministración xeral de cidadáns.
Ademais, o país atópase desde a medianoite do venres ao sábado en alerta por urxencia social, unha situación que permite preparar durante a fin de semana a rede de postos de abastecemento de urxencias.
