O presidente do Goberno en funcións, Pedro Sánchez, subliñou este venres que o marco constitucional actual conta coas ferramentas para solucionar os "conflitos sociais e políticos" do país e para afrontar tamén a "crise política e territorial" de Cataluña.

Na súa intervención ante os medios de comunicación antes da celebración do aniversario da Constitución, Sánchez sinalou tamén que hoxe é un bo momento para reivindicar e defender o "pacto entre diferentes" que se necesita para garantir a gobernabilidade.

Sánchez considerou que o texto constitucional de 1978 é un instrumento "fundamental" para resolver as crises territoriais e políticas que se poden ter, e neste sentido subliñou que hai "unha mancha" que vemos a diario nos medios de comunicación, que é "a de Cataluña".

A orde constitucional, engadiu, "creou o marco do Estado das autonomías" e ao mesmo tempo debe servir para "resolver" as citadas crises.

E ademais de aproveitar a Constitución para afrontar eses conflitos "políticos", Sánchez apelou á Carta Magna para tratar de resolver outras crises como a demográfica, co despoboamento de numerosas zonas do país.

O xefe do Executivo en funcións sinalou que esta é unha xornada de reivindicación "e fortaleza de todo o que representa a Constitución".

Pero tamén, neste momento de negociacións para investidura, e cando os socialistas tratan de chegar a un acordo con ERC que a permita, considerou necesario facer unha reflexión", a de que "o encontro, o diálogo, o acordo, o pacto entre diferentes" é algo que hai que "reivindicar hoxe máis que nunca" para "dar solución á crise de gobernabilidade".

Así, tras dúas eleccións xerais apelou á "responsabilidade, xenerosidade e entendemento" e ao "acordo entre diferentes".

Pedro Sánchez tamén recalcou que é importante revindicar hoxe dereitos como o da igualdade real entre homes e mulleres e insistiu na "loita sen cuartel contra a violencia que sofre a metade da poboación polo mero feito de ser mulleres".

Pero tamén apelou a outros dereitos como ao traballo digno, a vivenda digna, a pensión digna ou unha sanidade e unha educación de calidade.