domingo. 17.10.2021 |
El tiempo
domingo. 17.10.2021
El tiempo

Admite que abusou de 14 menores na Coruña e enfróntase a 38 anos de cárcere

O acusado de realizar tocamentos a menores, este martes na audiencia da Coruña. KIKO DELGADO (EFE)
O acusado de realizar tocamentos a menores, este martes na audiencia da Coruña. KIKO DELGADO (EFE)
Os feitos cometéronse entre xuño de 2018 e xaneiro de 2019

Un home acusado de abusar sexualmente de catorce nenas na Coruña, ás que perseguía ata os seus portais para realizarlles tocamentos, admitiu este martes os feitos, polo que a Fiscalía solicitou finalmente para el 38 anos de cárcere.

O fiscal solicitaba nun primeiro momento 51 anos de cárcere pero, ao final da sesión, rebaixou a petición de pena a 38 anos de prisión por entender suprimido o agravante de reincidencia derivada dos antecedentes penais por unha anterior condena ditada en 2008 pola Audiencia Provincial de Ourense por mor de feitos similares.

No xuízo, celebrado na Audiencia Provincial da Coruña, o acusado de trasladarse a esta cidade entre xuño de 2018 e xaneiro de 2019 e seguir a estudantes que camiñaban soas cara ás súas casas -todas menores de 16 anos excepto unha-, acceder aos portais dos seus edificios e realizarlles tocamentos, declarouse culpable de todos os casos, salvo dun.

O procesado, que permanece en prisión por estes feitos, sostivo que se remite ao "declarado" anteriormente cando o detiveron o 18 de xaneiro de 2019 e recoñeceu que lle gustaba e lle excitaba o contacto físico coas menores. "ía detrás delas, tocáballes o cu e marchaba", sinalou.

Así, o home, que negou padecer algunha enfermidade mental, asegurou que o día que foi detido residía en Santiago de Compostela e acudiu á Coruña a unha entrevista de traballo, feito que aproveitou para cometer un dos abusos na zona de Monte Alto.

Cando lle preguntaron se o fixo "en anteriores ocasións" respondeu que "si"; no entanto, na anterior declaración á que se remitiu de xeito constante negara un dos casos.

Durante a sesión, declararon doce das menores que relataron como o acusado as perseguiu ata os seus portais para abusar delas. 

Todas as vítimas identificárono en rodas de recoñecemento e moitas delas padecen problemas psicolóxicos, de insomnio ou teñen medo a saír á rúa na actualidade, aseguraron na sala.

A última nena da que presuntamente abusou declarou que, coa axuda duns mozos que estaban preto da escena, pararon ao sospeitoso cando se foi correndo", chamaron á Policía e conseguiron que o detivesen.

Nun dos casos, ocorrido o 1 de decembro de 2018, o home perseguiu dúas nenas á vez, unha delas de 11 anos e outra de 9, ás que ás que, segundo a Fiscalía, tocoulles nas súas partes íntimas. 

O home xa estivo en prisión anteriormente, entre 2008 e 2012, condenado por sentenza firme ditada pola Audiencia Provincial de Ourense por un delito continuado de agresión sexual en grao de tentativa e outro consumado, segundo matiza o Ministerio Público no seu escrito de cualificación.

Xa que logo, en todos os delitos que se lle imputan -dos que dous deles son delitos de abusos en grao de tentativa- concorre a circunstancia agravante de reincidencia e nun dos casos, a atenuante simple de confesión.

Así, a fiscal demanda que o procesado non poida aproximarse a menos de 500 metros das vítimas nin comunicarse con elas durante un período de tempo de entre catro e oito anos.

Solicita tamén o pago de indemnizacións para cada unha das vítimas de entre 1.000 e 2.000 euros, aínda que puntualiza que o pai dunha delas renunciou a calquera tipo de resarcimento.

Admite que abusou de 14 menores na Coruña e enfróntase a 38 anos de...
Comentarios