O mal tempo mantén a Galicia en alerta amarela este mércores. As choivas cebáronse especialmente ata o mediodía con algúns municipios das provincias da Coruña e Pontevedra. Segundo os rexistros de Meteogalicia, as precipitacións acumuladas ata o mediodía alcanzaron os 56,5 litros por metro cadrado en Poio e os 51,3 en Cuntis. O máximo da comunidade, con todo, alcanzouse no concello coruñés de Boiro (76,9), seguido de Lousame (59,5).
O vento, pola súa banda, deixouse sentir con maior intensidade na Mariña lucense. En Viveiro chegou a superar os 110 quilómetros por hora, mentres que en nbsp;Cedeira&tamén se superaron os cen (101,4 km/h) e en Cuntis faltou pouco, con 93,7 km/h. En zonas de montaña, o vento deixou refachos de intensidade máxima de 91,9 quilómetros por hora en Carballeda de Valdeorras e de 74,5 en Manzaneda.
O vento chegou a superar os 110 quilómetros por hora en Viveiro
AVISO POR INUNDACIóNS. A subida dos caudais en ríos das concas de Galicia-Costa levou a activar o Plan Especial por Risco de Inundacións (Inungal) da comunidade. En concreto, é nas concas dos ríos Xallas, Umia e Verdugo "onde se poden superar os caudais", polo que se activou o Plan Inungal "en fase de alerta".
Segundo avisou o 112 Galicia, poden producirse "inundacións eventuais e pequenos desbordamentos" nos seus contornos. Por iso, aconsella retirar vehículos das marxes dos ríos, evitar atravesar pontes e torrentes, ademais de abandonar as actividades en zonas fluviais.
O aviso amarelo por precipitacións esténdese ata as 18.00 horas no suroeste e oeste da provincia da Coruña, así como no interior da de Pontevedra.
