Tempo seco e asollado con temperaturas agradables para a época do ano. A predición vale para este xoves e practicamente para o resto da semana. Quizais a única excepción sexa o sábado xa que, segundo Meteogalicia, os ceos estarán algo máis cubertos, pero sen choiva.
O vento soprará do sur este xoves e haberá nubes de tipo alto que non impedirán o paso do sol ao longo do día. As temperaturas quedarán en lixeiro ascenso, especialmente as mínimas. En puntos de costa, como A Coruña ou Pontevedra non se baixará dos 9º. E as máximas, en practicamente toda a comunidade, roldarán os 20 graos.
UNHA FIN DE SEMANA AGRADABLE. O venres non se esperan cambios e o sábado si que Galicia quedará nunha situación intermedia entre un anticiclón situado sobre Polonia e unha profunda borrasca ao norte dos Azores. Será unha xornada con nubes de tipo medio e alto, con ceos máis cubertos no litoral atlántico ao longo do día e sen grandes cambios nas temperaturas, segundo Meteogalicia.
Pero isto só será momentáneo, xa que o domingo volverán os ceos despexados e o tempo asollado.
