Isto non é Fukushima, onde tres meses despois do tsunami e a fuga nuclear de marzo de 2011 rexistrouse un fenómeno idéntico. É Xinzo de Limia e, a pesar da súa aparencia, o noso protagonista non é froito dunha mutación radioactiva. É un coello nado sen orellas e sen rabo que por esta mesma causa, desde que a súa dona o deu a coñecer en Instagram, está a converterse nunha estrela nas redes sociais.
De brancura nívea, ollos curiosos e comportamento tranquilo e cariñoso, o gazapo naceu na parroquia de Faramontaos nunha data sinalada, o 25 de decembro, pero non foi ata un mes despois cando a criadora, María Dolores Sotelo, se decatou de que un membro da camada destacaba de entre o resto polo súa aparente impasibilidade: ao abrir a porta da coelleira, todos se asustaban e escapaban, "e ese non", rememora a muller na TVG.
Nese momento, María Dolores constatou que non era un coello calquera. Faltáballe, precisamente, unha das características definitorias da especie: as súas longas orellas. "Non ten nin buratiños", engade Alba, a súa propietaria.
"É unha cousa supercuriosa, e claro, dache tenrura", afirma mentres o garda no colo. "Os outros, aínda que sexan bonitos, non son tan especiais coma este", sentenza.
Coma se dun conto con moralexa se tratase, esa mesma diferenza é a que converteu ao coello nunha celebridade á que se consente todo tipo de luxos, empezando por unha gaiola nova na que os seus donos investiron máis de 100 euros.
E, por suposto, por petición popular, tamén lle apartou dun destino fatal. "Este coelliño, ata que morra de maior, a ver cantos anos dura", ratifica Alba, que foi a primeira en solicitar o indulto.
En tanto que a súa imaxe se viraliza na internet e atrae a atención de numerosos visitantes que desexan retratarse xunto a el, o gazapo permanece alleo a todo, igual de imperturbable que cando María Dolores se achega para alimentar ao grupo.
Con todo, o seu futuro apunta lonxe deste criadeiro ourensán. De entre todas as solicitudes de adopción que lle constan, hai unha que, por orde de chegada e por importancia sentimental, logrou levar o coello á auga, explica Alba. A estrela da camada será o particular agasallo de vodas que lle entregará a unha amiga súa.
