A Dirección Xeral de Tráfico realizará este fin de semana unha campaña intensiva de vixilancia e control de motocicletas e que se centrará no cumprimento da súa normativa.
Segundo informou a través dun comunicado, durante os fins de semana "aumenta de forma exponencial o uso das motocicletas", o que "xustifica a realización desta campaña de vixilancia co obxectivo de lograr unha maior concienciación dos usuarios dos vehículos de dúas rodas sobre a necesidade de facer un uso racional e axustado ás normas na condución".
No que vai de ano, a accidentalidade nas vías interurbanas de Galicia reflicte que o 16% foron vítimas mortais en vehículos de dúas rodas.
Os adiantamentos antirreglamentarios, os excesos de velocidade ou a velocidade inadecuada, o consumo de alcol e drogas ou a falta de casco constitúen os principais factores de risco, así como a maior parte das infraccións cometidas polos motoristas.
Ademais de concienciar aos condutores, a campaña busca alertar aos demais usuarios da vía sobre a elevada exposición ao risco destes usuarios e a necesidade de manter o nivel de atención constante e adaptar a condución ante a súa presenza.
España é segundo país da Unión Europea con máis motos e ciclomotores, con 5,4 millóns de unidades, o que representa o 15% do parque de vehículos e supón o 21% dos falecidos na estrada.
Desde o 1 de xaneiro ao 22 de xullo deste ano faleceron nas vías interurbanas galegas 5 motoristas e 1 usuario de ciclomotor. O perfil do motorista falecido en Galicia é o dun home de 39 anos, que se despraza por motivos relacionados co lecer en fin de semana.