lunes. 29.11.2021 |
El tiempo
lunes. 29.11.2021
El tiempo

A morte de Desirée en Muimenta: estamos ante un caso como o de Asunta?

Alfonso Basterra e Rosario Porto. EP
Alfonso Basterra e Rosario Porto. EP

As similitudes co crime de Santiago, cada vez máis patentes

Asunta Basterra Porto, de 13 anos, morreu asfixiada o 21 de setembro de 2013. Os seus pais adoptivos, Alfonso Basterra e Rosario Porto, foron achados culpables do crime e condenados en sentenza firme a 18 anos de cárcere cada un.

Como resultado da investigación e das probas practicadas, en relación á morte de Asunta Basterra determinouse que o seu falecemento se produciu por asfixia e que, anteriormente e durante meses, a nena inxerira un ansiolítico, Orfidal, que anulou a súa vontade antes de ser asasinada.

O corpo foi localizado despois de que, na madrugada do 22 de setembro, dous homes que circulaban por unha pista forestal do lugar de Feros, na localidade coruñesa de Teo, desen a voz de alarma. Durante as primeiras horas, os investigadores capitaneados polo titular do xulgado de instrución 2 de Santiago, José Antonio Vázquez Taín, determinaron que a nena falecera noutro lugar e que non sufrira agresión sexual.

A Asunta tamén lle administraron as pastillas que tomaba a súa nai e faleceu por mor dunha asfixia

As pistas apuntaron desde o primeiro momento á contorna próxima e, máis en concreto, aos seus pais, separados, que a noite na que se produciu a súa morte acudiran a unha comisaría de Santiago de Compostela a denunciar a desaparición da súa filla.

Con todo, as "inconsistencias" detectadas pola Garda Civil nas declaracións dos pais sobre os últimos movementos de Asunta e as primeiras probas precipitaron as súas detencións. Rosario Porto, coñecida avogada compostelá, foi detida o 24, dous días despois da localización do corpo. A Garda Civil trasladouna ao cuartel desde o tanatorio compostelán de Boisaca, onde acababa de asistir á incineración da súa filla.

Alfonso Basterra, xornalista, foi detido ao día seguinte, tras un rexistro nunha das vivendas da súa exmuller na que os axentes cren que se produciu a morte.

É a morte da nena de Muimenta un caso similar? É pronto para aseguralo, pero persoas relacionadas co caso xa o comentaron como tal xusto despois do crime: pola actitude da nai, Ana Sandamil, pola existencia de fármacos, polo sospeitoso modo en que foi atopada a nena. Obviamente, neste caso o pai, José Manuel Leal, non ten nada que ver porque nin sequera estaba na localidade de Muimenta.

A morte de Desirée en Muimenta: estamos ante un caso como o de Asunta?