Cando se cumpren tres anos da morte do mozo ferrolán Brais Bogo, cuxo cadáver apareceu nunha zona de Santiago onde conflúen os ríos Sar e Sarela nun caso que foi considerado un suicidio pola Policía, a familia do falecido publicou unha carta aberta en Facebook na que piden ao citado corpo de seguridade que reabra a investigación sobre o óbito. Aprecian indicios criminais que apuntan, segundo din, a un compañeiro de piso de Brais co que mantiña unha relación sentimental.
"A Policía deu por válida a coartada desta persoa, que dixo estar na Coruña. O día dos feitos este mozo, con antecedentes por roubos e condutas violentas, non contestaba o teléfono e, cando lograron falar con el, dixo que apenas coñecía a Brais. Despois un axente confesounos que lles mentiu en varios interrogatorios. Queremos que se esclareza o que pasou", escribe o irmán de Brais.