A Policía Nacional intenta localizar o propietario dun can de raza dóberman que o pasado día 16 abalanzouse sobre un mozo na praza de Barcelos, causándolle múltiples feridas. A propia vítima, de 26 anos, sumouse a esta procura e apela á colaboración cidadá para obter resultado positivo.

O ataque, desvelado por PontevedraViva, ocorreu cando o raparigo se dirixía cara ao centro de saúde que se atopa nun dos laterais da praza. Sen previo aviso, o animal —de nome Lulo— botóuselle encima, tirouno ao chan e comezou a mordelo por diversas partes do corpo, sen que o mozo puidese zafarse.

Foi o cliente dun bar próximo, duns 60 anos, o que interveu para auxiliar o mozo

Mentres, o dono do can intentou que a súa mascota cesase na agresión, pero nin se atreveu a agarralo nin fixo ningún ademán de porlle a correa que levaba na man, segundo consta na denuncia que a vítima presentou na Comisaría minutos despois. Tivo que ser o cliente dun bar próximo, duns 60 anos, o que interviñese para auxiliar ao mozo, á vez que lle ameazaba ao dono do can de que lle ía a denunciar.

A súa reacción foi emprender a fuxida á carreira pola rúa Perfecto Feijóo, saíndo o dóberman detrás súa. O agredido identificouno como un home duns 35 anos, de 1,80 aproximadamente , complexión normal e pelo curto e escuro.

A Policía Nacional tamén solicita axuda para dar co seu paradoiro. A vítima do ataque foi atendido nun centro hospitalario próximo, onde lle apreciaron "múltiples erosións en cara, pescozo, tórax, glúteo e xeonllo".