A Garda Civil está a investigar penalmente a un veciño de Cangas por un presunto delito contra a saúde pública por comercializar a través de internet un produto tóxico que ofrece falsas propiedades curativas para todo tipo de enfermidades.

O MMS (Miracle Mineral Solution) ou SMM (Solución Mineral Milagrosa) é o resultado da mestura do clorito de sodio co ácido clorhídrico e ao que lle atribúen falsas propiedades curativas, tomándoa en pingas diluídas na auga ou outra bebida.

A súa comercialización e publicidade foi prohibida no ano 2010 pola Axencia Española de Medicamentos e Produtos Sanitarios ao constatar o seu potencial risco para a saúde.

As investigacións iniciáronse o pasado mes de setembro cando o Equipo de Policía Xudicial da Garda Civil de Cangas tivo noticias sobre a venda online deste produto comercializado como suplemento alimentario.

As pescudas iniciais levaron aos investigadores á páxina web dunha empresa que ten o seu domicilio social en Cangas e cuxo obxecto é o comercio polo miúdo por correspondencia e Internet de produtos de estética, cosmética, nutrición, mantemento e coidado corporal.

O administrador da web anunciaba a venda os dous compostos químicos do MMS ademais do produto acabado e comercializábao co nome de Depur.

A través doutra páxina web, vinculada á anterior, achegábase información sobre o clorito de sodio e os seus "beneficios", ademais de enlaces a vídeos que mostran a elaboración e testemuños de curacións pola toma do produto, así como protocolos de actuación e dosificaciones.

A investigación concluíu coa inspección da sede social da empresa en Cangas onde se almacenaba, elaboraba e distribuía este produto considerado ilegal, no ámbito farmacéutico e sanitario.

Incautáronse preventivamente preto de cen litros dos distintos compostos químicos que conforman o MMS e unha importante cantidade de envases co produto xa elaborado (Depur).