Os investigados polo caso Blusens elévanse a cinco, cun novo arresto en Andalucía
A causa, pola que foi paralizada a comercialización dos aparellos WebTV, segue baixo segredo sumarial
Os investigados na causa contra un suposto delito de propiedade intelectual polos aparellos WebTV, que comercializa Blusens, elévanse a cinco persoas, de entre as que se atopa un novo detido nas últimas horas en Andalucía.
Fontes do Tribunal Superior de Xustiza de Galicia (TSXG) confirmaron a Europa Press que hai outros dous investigados ademais do tres detidos a pasada semana, entre os que se atopa o propietario da firma de electrónica galega, José Ramón García.
Un deles foi detido en Andalucía co fin de practicar un novo rexistro e quedou en liberdade tras pasar a disposición policial. Outro investigado, que estaba nese momento en Barcelona cando foi localizado, non chegou a ser arrestado.
A causa instrúea o Xulgado número 3 de Santiago, cuxo titular, Andrés Lago Louro, ordenou retirar da venda o produto que está baixo a investigación, que permanece baixo segredo de sumario. O produto –coa referencia actual— comercialízanse desde hai uns dous anos e en tenda ten un prezo que oscila entre os 90 e os 130 euros en función da oferta vixente.
Tras pasar a disposición xudicial, o fundador da empresa galega de electrónica Blusens quedou en liberdade provisional coa obrigación de comparecer en sede xudicial de forma periódica e coa retirada do pasaporte, tras ser detido en relación a un suposto delito contra a propiedade intelectual e organización criminal.
DENUNCIA ENTIDADE. A investigación iniciouse pola denuncia dunha entidade que xestiona a propiedade intelectual e indágase sobre supostos delitos contra a propiedade intelectual vinculados coa comercialización duns receptores WebTV.
Desde o martes 27 de febreiro deixaron de funcionar as aplicacións de recepción de sinal de televisión incluídas nos aparellos que comercializaba Blusens. Concretamente, permitían a posibilidade de descargar aplicacións coas que poder conectarse a ligazóns piratas de webs con películas, series e deportes, entre outros contidos.
OUTROS CASOS. No pasado outras causas afectaron a Blusens. Así, en 2012 o xulgado do mercantil número 1 da Coruña condenou a Blusens a cesar na elaboración e distribución do seu catálogo por entender que infrinxía os dereitos de propiedade intelectual de Televés.
Tras a quebra de Blusens, José Ramón García está á fronte, desde 2014, da compañía Visualiza Business, que conta con investimentos en diferentes sectores.
