jueves. 02.12.2021 |
El tiempo
jueves. 02.12.2021
El tiempo

Restrinxida a mobilidade en Ourense e Barbadás tras aumentar os contaxios

Uns operarios municipais realizan labores de desinfección nunha rúa de Ourense. BRAIS LORENZO (EFE)
Uns operarios municipais realizan labores de desinfección nunha rúa de Ourense. BRAIS LORENZO (EFE)
Ademais, prohíbense as reunións de persoas non convivientes nos concellos de Barbadás, Verín, O Barco de Valdeorras, así como na comarca do Carballiño

A Consellería de Sanidade acordou restrinxir a mobilidade nos concellos de Ourense e o limítrofe de Barbadás debido á evolución da pandemia por coronavirus na zona. 

Os habitantes de Ourense e Barbadás non poderán desprazarse fóra dos seus límites municipais excepto por motivos laborais, educativos ou sanitarios desde a medianoite do próximo xoves. 

A decisión foi adoptada polo comité clínico que segue a evolución da covid-19 en Galicia, que se reuniu a tarde deste martes para analizar a situación epidemiolóxica na comunidade autónoma.

OUTRAS DECISIÓNS. Ademais, tamén se decidiu prohibir as reunións de persoas non convivintes nos municipios de Barbadás, Verín e O Barco de Valdeorras, así como na comarca do Carballiño, unha medida adoptada o venres da semana pasada na cidade de Ourense, onde se mantén esta mesma restrición. 

Nos municipios de Ourense e Barbadás aplicaranse as medidas de nivel 3, polo que estará prohibido que bares e cafeterías poidan servir no interior e só poderán atender nas terrazas a grupos de cinco persoas. Os restaurantes poden servir no interior, a un máximo de cinco persoas por mesa. 

Ademais entran en nivel 2 os concellos das comarcas do Carballiño, Ourense, O Ribeiro, Allariz, Verín e O Barco. Entre as restricións xerais deste nivel inclúense a limitación dos aforamentos ao 50% nos establecementos comerciais, de restauración e hostalería -onde ademais estará prohibido o consumo en barra-, así como en bibliotecas, academias, autoescolas e centros privados de ensino non regulado, entre outras. 

Tamén se establece a limitación do número máximo de persoas nas reunións tanto privadas como na vía pública fixado nun máximo de dez persoas; así como a redución dos aforamentos en celebracións, velorios e lugares de culto. 

Todas estas medidas entrarán en vigor tamén desde as 00:00 horas do próximo xoves. Nun comunicado, a Consellería de Sanidade sinala que busca actuar de forma máis "máis selectiva e con maior rapidez ante a aparición de casos nunha zona concreta", polo que se pode adoptar restricións por áreas sanitarias, por concellos, cidades ou incluso por barrios. 

Restrinxida a mobilidade en Ourense e Barbadás tras aumentar os...
Comentarios