O Goberno italiano decidiu aprobar o "bloqueo total" do país para tratar de facer fronte ao avance do coronavirus, co peche durante "un par de semanas" de todos os negocios, fóra dos que ofrecen servizos de primeira necesidade, como supermercados ou farmacias.
"Italia sempre será unha zona única, unha zona protexida. Dispoñémonos a pechar toda a actividade comercial, a venda comerciante polo miúdo, excepto os negocios de primeira necesidade e farmacias", dixo o primeiro ministro, Giuseppe Conte, en rolda de prensa.
"Non é necesario saír correndo ao supermercado a facer a compra", precisou Conte, quen avisou de que "se todos respectan estas regras o país sairá antes da urxencia" do coronavirus, que causou xa 827 falecidos e máis de 12.000 contaxios no país.
Conte subliñou que permanecerán pechados bares e restaurantes, aínda que se permitirá o envío de comida a domicilio, e tamén barberías e centros de estética. Negocios que se sumarán aos xa pechados nos últimos días, como os cines, teatros, museos, ademais de escolas e universidades. Garantiranse con todo servizos como o transporte público, ou servizos esenciais como os bancarios, postais, aseguradoras; e tamén a actividade agrícola.
"Hai uns días pedinlles un cambio na súa forma de vida, pedinlles que quedasen en casa. Agora é momento de ir máis lonxe", di Conte
"Para ter unha resposta positiva destas medidas debemos esperar un par de semanas", apuntou o primeiro ministro, quen destacou que "este é un paso máis", necesario na contención da propagación do virus. Sinalou que todas as decisións tomadas polo Executivo ata agora tiveron como "obxectivo prioritario" garantir "a saúde da xente" e apuntou a que é necesario implementar accións "gradualmente para que todos comprendan o momento difícil" que vive o país.
"Italia está a demostrar ser unha gran comunidade, unida e responsable. Neste momento todo o mundo nos mira, en primeiro lugar polo número de contaxios, pero tamén porque estamos a tomar medidas rigorosas. Mañá non só nos mirarán senón que nos admirarán e tomarannos como exemplo dun país que, con responsabilidade, conseguiu superar esta pandemia", concluíu.
O Goberno italiano xa decidiu o luns decretar a restrición de movemento en todo o país, prohibiu temporalmente as concentracións públicas e os eventos deportivos, e pecháronse escolas e universidades, cines, museos e teatros, para intentar conter a propagación do virus.
