O barco Aquarius, que leva 629 inmigrantes e diríxese cara a España, chegará a finais de semana ao porto de Valencia, que está preparado para acollelo, segundo puido saber Efe en fontes que coordinan o dispositivo.
Segundo a distancia á que se atopa actualmente o barco, en augas do Mediterráneo entre Italia e Malta, as estimacións indican que tardará catro días en chegar ao porto valenciano.
Representantes da Autoridade Portuaria de Valencia participarán na reunión convocada para este martes polo Goberno valenciano para a atención e acollida de persoas refuxiadas e desprazadas forzosamente, co fin de coordinar a chegada a este porto do barco Aquarius, no que van 120 nenos non acompañados.
A comisión mixta, que se reunirá este martes ás 16.30 horas, está composta polas diferentes Consellerias implicadas (Sanidade, Educación e Igualdade e Políticas Inclusivas), a Federación Valenciana de Municipios e Provincias, as Deputacións, a Universidade de Valencia e as entidades Accem, Cepaim, Cear, Cáritas, Acnur e Cruz Vermella, e tamén asistirán representantes do Concello de València.
Segundo explicou a vicepresidenta do Consell, Mónica Oltra, o presidente de Baleària ofreceu toda a súa loxística, tanto en terra como en mar, que se poida necesitar, como fixo en 2015.
COMPROMISO DE ESPAÑA. O presidente do Goberno, Pedro Sánchez, informou este luns da decisión do Goberno. "España debe cumprir cos compromisos internacionais en materia de crises humanitarias" e acojerá ao barco Aquarius.
"É a nosa obrigación axudar a evitar unha catástrofe humanitaria e ofrecer 'un porto seguro' a estas persoas, cumprindo desta maneira coas obrigacións do Dereito Internacional", afirma o comunicado do Goberno.
