Galicia continuará o xoves con predominio das altas presións, con entrada de aire frío e húmido desde o norte, co que a xornada amencerá cos ceos cubertos no litoral, con posibilidade de orballos, pero con menos nubes cara ao sur.
Pola tarde, os ceos quedarán pouco cubertos ou despexados en xeral, con nubes de estancamento no litoral norte e nubes de evolución nas áreas de montaña.
Así o recolle a predición de Meteogalicia, que anuncia que as temperaturas mínimas non manifestarán cambios significativos mentres que as máximas sufrirán un descenso entre lixeiro e moderado. Deste xeito, entre as sete principais cidades galegas, as máximas situaranse en Ourense, aínda que nesta ocasión non superarán os 33 graos, e en Pontevedra con 32.
En canto ás mínimas, oscilarán entre os 16 graos de Vigo e Pontevedra e os 19 de Ourense.
Os ventos soprarán frouxos de compoñente norte, con algún intervalo de moderado no litoral.
