Beatriz Sotelo, do restaurante 'A Estación' de Cambre, proclamouse gañadora da segunda edición do Concurso 'Cociñeiro do Ano', disputado no marco da Feira Alimentaria de Barcelona e que promove o grupo editorial e hostaleiro Caterdata.
Beatriz, de 26 anos e única muller finalista, impúxose aos outros sete competidores, procedentes de diferentes comunidades autónomas españolas, cun menú composto por canelón de faisán con zume de asado e trufa, de primeiro prato; pescada de Celeiro con pemento verde ao pil pil de limón, de segundo; e améndoa, albariño e mazá, de sobremesa.
Xurado
O xurado deste concurso estivo formado por Martín Berasategui (3 estrelas Michelin); Jordi Cruz (gañador da primeira edición desta proba e chef estrela Michelín máis nova de España, recentemente fichado como cociñeiro da AVE Madrid-Barcelona); Rafa Morales (2 estrelas Michelin, do restaurante “La Alquería”, do Hotel Hacienda Benazuza); Mey Hofmann (1 estrela Michelin, do restaurante Hofmann); Adolfo Muñoz (restaurador, propietario do Grupo Adolfo Restauración), Fausto Airoldi (representante da World Association of Cook Societies); Óscar Teixido (profesor da Escola de Hostalería e Turismo CETT de Barcelona) e Pepe Salmerón (profesor do Centro de Cualificación Turística de Murcia).
O premio para Beatriz Sotelo consiste nun cheque de 12.000 euros, un forno valorado noutros 9.000 euros e outros galardóns doados por distintos patrocinadores do evento.
