Este xoves chega unha fronte pouco activa que deixará unha xornada de ceos parcialmente nubrados e de choivas débiles na metade oeste do territorio, máis probables durante a mañá. Segundo a información publicada por Meteogalicia, dependente da Consellería de Medio Ambiente, o litoral estará en alerta laranxa ante a previsión de ondas que en zonas como A Mariña, as Rías Baixas ou a Costa da Morte poden chegar ata os 6 metros de altura, sobre todo nas primeiras horas da xornada.
Xa pola tarde, o nivel de risco rebaixarase a amarelo, aínda que a ondada seguirá sendo perigoso e persiste a recomendación de extremar as precaucións nas zonas próximas ao mar.
En canto ás temperaturas, experimentarán un lixeiro ascenso. Nas grandes urbes galegas alcanzaranse os 17 graos en Ourense e os 16º en Lugo, mentres que en Pontevedra espéranse 15 graos de máxima. Respecto das mínimas, a capital lucense rexistrará os valores máis baixos das sete cidades (8 graos), mentres que na Boa Vila ou Vigo os termómetros non baixarán dos 12 graos.
