UXT e CC OO pactan un preacordo polo convenio do metal da Coruña

Os sindicatos UXT e CC OO anunciaron un preacordo sobre o convenio do metal na provincia da Coruña, que contempla "máis de 8 puntos de incremento salarial", segundo comunicaron as centrais.

A xuízo da primeira delas, a convocatoria conxunta de folga indefinida e as xornadas de paro xa desenvolvidas entre xuño e xullo pasados "forzan á patronal ao preacordo". O entendemento logrouse este venres "ao amparo dunha mediación no Consello Galego de Relacións Laborais, que pon fin a un conflito que xa duraba máis de 3 anos".

UXT recordou que o convenio "afecta a máis de 18.000 traballadores na provincia da Coruña" e que estaba "vencido desde 2014". O pacto, ao seu entender, permitirá "unha estabilidade ata 2020" e a "continuación da recuperación e o fortalecemento do sector". O anuncio de folga indefinida, desvelado o pasado mércores e que sería efectivo desde o 19 de setembro, "precipitaba unha convocatoria da mediación" este venres, sinalou a central sindical.

Tras un encontro de "máis de 8 horas", o entendemento plasmouse en aspectos como un "incremento salarial de máis de 8 puntos e a recuperación da cláusula de revisión salarial", así como a "obrigación de aplicar o convenio do metal aos traballadores das empresas multiservicios que operen" no seu ámbito.

Tamén se prevén "licenzas e permisos de ata 22 horas para acompañar aos fillos menores de 15 anos e aos pais a cargo ao médico". En paralelo, disponse "tres días por enfermidade grave ou hospitalización en días laborais alternos".

O documento referendado refire a "recuperación de puntos tan ansiados como a consolidación e incremento dos pluses de xefe de equipo, actualización da antigüidade ou activación da tan demandada revisión salarial", concretou UXT. "Todo isto, sen deixar polo camiño que se contemple a subrogación no mantemento para aqueles que presten servizo en empresas públicas", estimou. A maiores, alúdese á "creación de comisións de traballo nas que se analizará e estudará a inclusión da subrogación para outros sectores e os acordos do naval".

O sindicato valorou que as "mobilizacións levadas a cabo polos traballadores, así como a convocatoria da folga indefinida, foron fundamentais para poder chegar a este preacordo". Na súa opinión, "a patronal viuse na obrigación de ter que renunciar ás pretensións que perseguían de forma irrenunciable, talles como menos indemnización e menos retribución os primeiros anos para os temporais". UXT someterá o texto, "para a súa ratificación, aos órganos de dirección e ás bases do sindicato".