O agora emprendedor Sergio Cortés viviu en Cortegada ata que comezou unha vida nómade por todo o continente americano xunto coa súa esposa veterinaria e os seus dous fillos, cando el era traballador do banco Santander.
"En Latinoamérica hai moito español que é directivo de empresas multinacionais pero en realidade hai poucos emprendedores e eu decidinme a dar o salto porque en Colombia descubrín que a alimentación de España ten moito prestixio pero son descoñecidos os seus produtos", indicou.
Tras ese descubrimento, Cortés iniciou a súa dedicación a importar produtos españois como aceites e xamóns ata Colombia, onde se asentou pois xa tiña amigos no país.
Para unha utópica pequena Galicia
Tras uns anos como importador de colectores de alimentos, Cortés sentiu a necesidade de rodearse de todo aquilo que botaba de menos da súa terra natal, segundo explicou, e para iso abriu hai seis meses unha pequena tenda en Bogotá que vai enchendo aos poucos de "delicatessen " de España, aínda que cada vez ten máis de Galicia.
"É unha utopía pero realmente sigo botando de menos produtos que teño que conseguir levar alá, aínda que todo isto leva tempo polos trámites burocráticos e pola falta de mentalidade exportadora dalgunhas empresas deste lado do océano", agregou.
Nese sentido, a súa esposa levou a receita da empanada e cada día prepáranas de bonito con pementos para a súa venda na tenda, xunto con aceite envasado en Galicia, viños do Ribeiro e conservas de todo tipo, entre outros.
Explicou que Colombia é un país con tres mares e con todo, sen ministerio de Pesca, consumidor de peixe sobre todo de río e que valora moito os produtos mariños elaborados como as conservas de mexilóns e berberechos.
Agora proxecta ampliar a súa oferta con polbo, augas envasadas, pan de Cea e augardentes e espera, co tempo, ter a oportunidade non só de dar a coñecer os produtos, senón tamén o seu proceso de elaboración artesanal.
Para animar aos emprendedores
Cortés incidiu diante dos emprendedores reunidos en Ourense, na importancia de ir "aos poucos e buscar a rendibilidade non antes de dous anos" e para animarse, narrou a experiencia precedente que coñece do seu pobo natal, onde hai unha igrexa construída en 1554 polo arcebispo de Bogotá que era un cura natural de Cortegada.
A súa viaxe a Ourense para participar no encontro de emprendedores non o fixo só xa que o aproveitou para traerse, cuns días de diferenza, a un grupo de empresarios colombianos para que coñezan os produtos de Galicia.
