O 30 de setembro cumprirase o prazo para a posta en marcha da "Ruta do viño da eurorrexión Galicia-norte de Portugal", cuxa preparación comezou hai anos e que deixa como primeiro resultado visible, a creación das cinco asociacións "Ruta do Viño" das 5 denominacións de orixe vitícolas de Galicia e a do D.O. portuguesa "Vinhos Verdes".
Proceso longo
Os socios do proxecto presentado e aprobado polos Fondos Europeos de Desenvolvemento Rural (Feder) foron a Comissao Viticultura dá Regiao Vinhos Verdes, a Axencia Galega de Desenvolvemento Rural (Agader), a Sociedade de Imaxe e Promoción Turística de Galicia (Turgalicia) e o concello de Ribadavia.
O traballo conxunto frutificou en cursos de capacitación en enoturismo, un estudo sobre a viabilidade das rutas do viño e sobre o enoturismo, elaboración dun manual da ruta transfronteiriza, sinalización das seis rutas que a integran, un manual de historia e lendas do viño, creación dunha páxina en internet e outras.
Pouco antes de que finalice o proxecto, hai 200 establecementos do sector integrando as correspondentes rutas do viño, tanto adegas como aloxamentos, restaurantes, museos, bares, concellos e outros.
O enoturismo é un atractivo para viaxar
Segundo un estudo xeral do enoturismo en España achegado a GG por Agader, preto da décima parte dos turistas que chegan a España buscan a súa gastronomía e a relación viño-gastronomía é o obxectivo de seis millóns de persoas que chegan cada ano a España.
Ademais, o 53 por cento da poboación española dixo escoller o destino das súas viaxes e vacacións pensando na gastronomía e o viño e un 72,62 por cento fixo algún destas viaxes con esa motivación exclusiva.
O estudo indica que uns seis millóns de persoas non españolas buscan viño e gastronomía, igual que outros dez millóns de turistas españois, e todos eles aproveitan as súas viaxes para comprar viño, gozar do patrimonio natural e cultural, visitar adegas, participar en catas e degustacións e implicarse en festas e eventos gastronómicos.
Os viaxeiros infórmanse nun 16,34 por cento por estar subscritos a algunha publicación de enogastronomía, páxina de internet ou revistas especializadas e en xeral, seguen recomendacións de amigos e as que ven en páxinas web especializadas.
O mesmo estudo indica que o gasto medio diario por persoa é de 163,62 euros no que se inclúen o aloxamento e as comidas.
O atractivo aumenta co autóctono
Os turistas decídense nas súas viaxes polos restaurantes e aloxamentos que ofrecen unha decoración e ambiente especiais e en menús e cartas a presenza de produtos tradicionais da zona, ademais da profesionalidade e bo servizo.
En relación aos menús, o estudo desvela que para os turistas, unha boa comida é a que ofrece calidade nas materias primas, uso de produtos da terra, receitas tradicionais e unha excelente presentación de cada prato.
Sobre a carta de viños, os turistas esperan unha ampla presenza dos viños da zona, coñecementos de viño por parte do persoal, boa presentación e temperatura para a bebida e oferta doutros viños de España.
Futuro enoturístico de Galicia
O primeiro Seminario Internacional de Enoturismo que se celebrará en Leiro os días 21 e 22 de septeimbre, dará a coñecer as accións futuras desencadeadas polo proxecto europeo e os resultados obtidos polo enoturismo doutras zonas que o desenvolveron antes que Galicia.
O punto de partida son cinco "Rutas del Vino", integradas na asociación "Rutas del Vino de España", algunas xa certificadas como a de Rías Baixas -desde 2005- e Ribeiro -desde 2009- e outras nos últimos trámites aínda que xa contan con asociación xestora, socios, logotipo e primeiras accions formativas.
A identificación das diferentes "Rutas del Vino" de Galicia, e tamén a de Vinhos Verdes de Portugal, pasa polo uso de cores como os verdes das follas e os morados dos viños tintos, aínda que no caso da "Ruta del Vino" Ribeira Sacra tamén estará presente a cor dourada nun rosetón románico que alude ó ouro que os romanos esperaban extraer no norte e noreste da provincia de Ourense e a riqueza monumental posterior ligada á arte románica.
Fontes históricas indican que ante a escasez do valioso metal, os romanos decidiron aproveitar os mesmos chans para a producción de viños que gozaron de prestixio na corte romana.
