O cociñeiro Marcelo Tejedor será protagonista, o vindeiro sábado, dunha nova sesión do programa gastronómico 'Santiago Repetirás', coa presentación dun innovador taller no que os asistentes poderán experimentar en que consiste un día na vida dun cociñeiro, facendo primeiro a compra do produto para convertelo logo en menú.
A experiencia, que organiza Turismo de Santiago, comezará ás dez da mañá do 24 de xaneiro, coa visita ao tradicional mercado de abastos. Alí, os asistentes aprenderán co chef de Casa Marcelo a recoñecer os mellores produtos.
Seguidamente, esta destacada figura da cociña de autor galega, posuidor actualmente dunha estrela Michelín, elaborará no Hostal dous Reis Católicos un menú de tempada cos produtos comprados.
380 participantes
Cada participante terá que pagar 20 euros para poder participar no taller, o que lle permitirá logo degustar os pratos preparados.
Desde o comezo de 'Santiago Repetirás', o pasado mes de novembro, son xa 380 as persoas que asistiron ás actividades gastronómicas, consistentes en catas de viños maridados con produtos galegos, talleres gastronómicos para nenos e dúas sesións de 'Merco e cociño con...', nas que participaron os cociñeiros Iago Castrillón, gañador do I Concurso de Tapas de Turismo de Santiago, e Beatriz Sotelo, nomeada mellor cociñeira do Estado en 2008.
Marcelo Tejedor ensina os seus segredos en 'Santiago Repetirás'
