O catador chantadino Bruno Lovelle será o único lucense que participe na final do campionato nacional Nariz de Ouro que se disputará os días 14 e 15 de xuño en Madrid, o máis pretigioso do país no mundo da sumillería. Lovelle foi elixido xunto a outros once catadores da zona noroeste -que inclúe as comunidades autónomas de Galicia, Castela León e Asturias- nunha semifinal que se disputou esta semana en Santiago de Compostela, no Hostal dos Reis Católicos. Superaron a proba once expertos, seis deles galegos e só o chantadino da provincia de Lugo.
Nesa semifinal, Lovelle tivo que pasar unha proba teórica sobre sumillería e unha proba práctica destinada a detectar os mellores narices de entre todos os candidatos. Nun primeiro momento a cada aspirante presentáronselle catro copas de viño para que puidese ver a cor e outros aspectos dos caldos. Despois mostráronlles un deses catro viños nunha copa negra, o aceno de identidade do certame, e só a través do olfacto e tendo en conta o recordo visual da proba anterior tiñan que identificar a zona de produción, a anada, a presenza de madeira, os meses de crianza e todo o que puidesen achegar do viño en cuestión. A copa negra escondía unha mostra das viñas de Azpilicueta de Mendavia (Navarra), da denominación de orixe A Rioxa, en concreto un tempranillo de 2011 con oito meses de barrica en carballo americano. O nariz de Lovelle atinó de cheo.
O próximo xuño o chantadino estará entre os 72 finalistas que superaron probas iguais á de Santiago en Bilbao, Sevilla, Mardrid, Barcelona e Valencia. Dos 72 elixiranse os mellores en base a varias probas e dese reducido grupo sairá o Nariz de Ouro. O reto de Bruno Lovelle no certame é superar a marca do ano pasado, cando tamén pasou á fase nacional, e imporse como Nariz de Ouro nacional.
SIGNIFICADO
Na actualidade Bruno Lovelle é o catador do restaurante que leva a súa familia en Chantada, o Jema, e do Palacio de Sober. Cando o ano pasado quedou entre os mellores da zona norte xa se lle abriron algunhas portas como as de «o consello regulador da denominación Ribeira Sacra, algunhas catas doutras denominacións e a oportunidade de impartir e asistir a varias iniciativas formativas». Este ano espera o mesmo e cre que estar de novo na final será unha nova lombeirada á súa carreira. Ademais, se se fai co título será un logro cumprido como catador. Mentres tanto segue experimentando día a día, cheirando moitos viños e adestrando o seu nariz para ser a mellor de España.
Explica este catador que polo seu traballo xa adestra o seu olfacto a diario, pero de aquí ao concurso non pode baixar a garda e, aínda que non fará un adestramento específico, si que ten intención de intensificar un pouco as súas catas. «Sempre se pode experimentar con aromas, intentar distinguir matices nas cousas que cheiras anque sen chegar a obsesionarse co tema porque pode causar o efecto contrario», explica. A serenidade tamén é unha baza para a última fase do certame.
400 profesionais no certame
O Nariz de Ouro é a competición de catadoras máis prestixiosa de España. Máis de 400 profesionais en activo concorren cada ano para converterse no novo Nariz de Ouro.
Anterior edición
O sevillano José Joaquín Cortés foi Nariz de Ouro en 2012. Na última proba bateuse con seis rivais e tivo que identificar un branco Marimar Está Don Miguel Vineyard Chardonnay 2008, un tinto Navaherreros Garnacha de Bernabeleva 2009, un Porto Quinta do Crasto 2006 Latexa Bottled Vintage, un Bagazo Pazo de Señorans e un Whisky The Glenlivet 12 anos.
