O Consello Regulador da Denominación de Orixe Ribeiro acaba de presentar a súa nova páxina web (www.ribeiro.es). Tras ano e medio de traballo, o seu actual sitio en internet supón un salto cualitativo con respecto ao anterior, aberto en 2004, tanto no contido como na forma.
Un deseño atractivo, limpo e accesible únese a unha listaxe rigorosa das adegas e colleiteiros, datos técnicos, datos de contacto, información sobre a denominación, o Consello, as festas e rutas vinculadas ao Ribeiro, así como aplicacións de valor engadido que que satisfarán a curiosidade dos internautas (webcam, fotos, vídeos, enlaces de interese, descargas, etc.).
Unha páxina que, segundo os seus promotores, “cumpre o triplo propósito de informar, formar e entreter, sen esquecer o principal obxectivo de satisfacer as necesidades do noso público e os nosos produtores, a través da información e promoción do noso principal legado”.
Novos tempos
“Hoxe en día é tan importante estar presente en feiras como na Rede”, explica Luís Ángel Rodríguez Vázquez, presidente do Consello. A necesidade de adaptarse aos novos tempos, á Sociedade da Información e ás Tecnoloxías da Comunicación (TIC) explican o importante avance dado pola entidade coa creación dun sitio que define como “máis funcional, transparente e accesible para os internautas”.
Internet xorde como unha aposta firme na promoción e comercialización dos viños do Ribeiro, e na actualización das canles de comunicación cos produtores, co público especializado e clientes en xeral. A nova páxina web nace como continuación da anterior, máis primitiva, apenas un ensaio desta, pero supón unha renovación profunda polos seus cambios tanto no aspecto e manexo como no volume e calidade da información que se proporciona.
Esta canle recentemente aberta “é unha forma de comunicación cos clientes, pero tamén cos nosos produtores, as nosas adegas e colleiteiros”, engade Rodríguez Vázquez, quen tamén explica que “unha denominación debe ter unha fiestra de acceso a internet. De aí a razón da dobre accesibilidade, xa que o público poderá consultar os datos dos produtores non soamente a través da nosa páxina, senón tamén por medio dun acceso directo que os dirixirá cara ás páxinas web das adegas integrantes”.
Noticias de interese
A comunicación non só se cinguirá ás cuestións técnicas, senón a todo tipo de noticias de interese relacionadas coa Denominación e co seu labor de promoción, ademais dos propios eventos, convocatorias de prensa, feiras, etc., das que se facilitará ampla información, que será actualizada semana a semana.
Na liña das novas tecnoloxías, a páxina recentemente estreada conta tamén cunha webcam, aplicación da que o seu público xa puido gozar no pasado, coa retransmisión de anteriores edicións da Feira do Viño. Isto, unido a enlácelos (links), un apartado de descargas e outro de vídeos, ademais da información gráfica e o propio deseño da web, colmarán, segundo o Consello Regulador, “a curiosidade dos internautas afeccionados ao bo viño”.
