NARRACIÓN. Así contamos o escrutinio

O PP gañou en todas as provincias de Galicia, cun total de 41 escanos e máis de 675.000 votos, e En Marea logrou situarse como segunda forza nas circunscricións da Coruña e Pontevedra, e tamén no Parlamento galego xa que, aínda que contará co mesmo número de deputados que o PSdeG, conseguiu 16.000 votos máis.  Así mesmo, o BNG conseguiu manterse e perdeu só un escano (uns 28.000 votos menos que en 2012), a pesar dos malos prognósticos de todas as enquisas.

Así, segundo os resultados provisionais facilitados pola Xunta, e co 99,85% do escrutinio, o respaldo aos populares foi do 47,5%, e Feijóo logra non só consolidar a súa maioría, senón aumentar os apoios en toda Galicia. Nestes comicios, o PPdeG obtivo uns 14.000 votos máis que nas autonómicas de 2012 e 32.000 máis que nas últimas eleccións, as xerais de xuño.

Na provincia de Pontevedra, onde o candidato á reelección presentouse como cabeza de lista, o PP obtivo máis de 210.000 votos (un 0,43% máis que nas anteriores galegas) e mantén os seus 11 deputados. Mentres que os apoios na Coruña foron 276.000 (un 2,4 % máis) e mantén 13 escanos; en Lugo, máis de 96.500 (un 1,4 % máis) e baixa de 9 a 8 deputados (nesta circunscrición elixíase un deputado menos que en 2012); e en Ourense, algo máis de 92.000 (un 4 % máis) e sobe de 8 a 9 deputados.

Con respecto ás últimas eleccións xerais, nas que Galicia elixiu a 23 deputados, só os populares e o BNG aumentaron o seu respaldo. Así o PP pasou dos 643.827 votos de xuño aos máis de 675.000 deste domingo; o PSOE, perdeu máis de votos; e En Marea obtivo uns 73.000 votos menos.

É significativo o incremento de votos do BNG nesta cita autonómica con respecto ás eleccións xerais. En xuño, a formación nacionalista só conseguiu 44.902 votos (incluso 26.000 menos que nos xenerais de decembro), pero este domingo logrou 'manter o tipo' e obtivo máis de 118.000 papeletas.

En liñas xerais, as provincias do interior foron maioritariamente afíns aos populares. Alí, o partido de Feijóo foi o primeiro, a pesar de perder un representante en Lugo, onde obtivo 8 escanos, seguido do PSdeG con 3, de En Marea con 2 e do BNG con 1. No caso de Ourense, o PP afiánzase como primeira forza, con 9 deputados (un máis que en 2012), seguido por PSdeG, con dous; En Marea con outros dous; e o BNG con un.

Nas provincias atlánticas, A Coruña e Pontevedra, a formación encabezada polo exmaxistrado Luís Villares colócase como segunda. No caso da Coruña, o PP mantén os seus escanos, e En Marea logra 5 representantes, os mesmos que os socialistas, pero con máis votos; e o BNG queda con 2. En Pontevedra, onde tampouco hai cambios no número de escanos do PP, En Marea tamén logra, con 5 deputados, o 'sorpasso' ao PSdeG, que baixa de 5 a 4; e o BNG perde a un representante, e queda con 2.

A repartición dos escanos da oposición no Parlamento galego cambiará sensiblemente con respecto ao que saíu das urnas nas anteriores eleccións autonómicas. Así, o PSdeG pasará a ser a terceira forza política en Galicia e, aínda que terá os mesmos deputados que En Marea, logrou 16.000 votos menos.

CAÍDA DO PSDEG. A formación do candidato Xoaquín Fernández Leiceaga perdeu 43.000 apoios en todas as provincias galegas, con respecto a 2012, e só logrou manter o número de escanos na Coruña. Así mesmo, tamén perdeu uns 91.000 votos con respecto aos xenerais de xuño.

No caso de En Marea (confluencia de Anova, EU, Podemos e mareas atlánticas), logrou situarse como segunda forza, con máis de 270.000 votos, pero con moitos menos apoios dos obtidos nas xerais de xuño (344.143 votos). Comparando os seus resultados cos de Age, a súa coalición-xerme, En Marea logrou aumentar 5 deputados: dous máis na provincia de Pontevedra, e un máis na Coruña, Lugo e Ourense.