O presidente da Xunta, Alberto Núñez Feijóo, defendeu hoxe a riqueza do rural durante a entrega de premios aos distinguidos nas Catas de Galicia 2014 e dixo que hai oportunidades "nun espazo xerador de riqueza e de emprego".
No seu discurso na Cidade da Cultura, dixo que proba diso son os 59 queixos participantes, 24 de tetilla, 22 de Arzúa-Ulloa, 10 de San Simón da Costa e 3 do Cebreiro; xusto as catro denominacións de orixe galegas que colocaron no mercado en 2013 case cinco millóns de quilos de queixo, aproximadamente o 25% da produción, 32 millóns en volume de facturación. E tamén o demostran, proseguiu Feijóo, as 28 meles, 10 monoflorales e 18 multiflorais, cunha indicación xeográfica protexida, Mel de Galicia, que representa as dúas terceiras partes do total dos meles que se producen en España.
Ante esta marca de participación, o máximo mandatario autonómico viu afianzado o compromiso da Xunta coa mellora da produtividade, competitividade e posta en valor dos produtos do sector. "Estamos comprometidos coa mellora da produtividade, coa transformación, coa comercialización e coa promoción dos produtos do sector agroalimentario", reflectiu.
O presidente da Xunta remarcou ademais a excelencia e calidade dos produtos galegos que se ofrecen aos visitantes e destacou que a enogastronomía é o segundo motivo polo que os viaxeiros elixen Galicia. Ademais, apuntou que, segundo as enquisas, un de cada tres turistas di que a gastronomía é o principal factor de atracción de Galicia.
Núñez Feijóo probou no Monte Gaiás o mel e o queixo.
Feijóo defende o rural como ''xerador de riqueza e emprego'' na entrega das 'Catas 2014'
