A Festa do pemento de Arnoia (Ourense) ten lugar cada primeiro domingo de agosto. A celebración orixinouse en 1980, ao axuntar a festividade do patrón da parroquia de San Salvador coa exaltación do produto gastronómico máis popular do municipio.
Declarada de interese turístico, o programa desta festa inclúe actos relixiosos, culturais, deportivos, verbenas e, por suposto, a degustación dos pementos de Arnoia, regados sobre todo con viños do Ribeiro.
'Carballeira'
O escenario principal da celebración é a carballeira da Queixeira, debidamente acondicionada para a ocasión e dotada de mesas, bares, postos de exposición de produtos e zona de servizos, así como dunha ampla zona de aparcadoiro.
Os pementos (chegan a consumirse ata 12 toneladas) cocíñanse de diferentes xeitos: recheos, asados e fritos son os máis habituais, aínda que tamén se comen en tiras ou como ingredientes destacados dunha tortilla.
Os inconfundibles pementos de Arnoia son de cor verde claro e máis grandes que os seus primos irmáns de Padrón. O seu sabor é suave e non pican.
