Galicia arrincou a semana como deixou a anterior: tiritando de frío aínda que sen ter que preocuparse por protexerse da choiva. Este luns, os termómetros baixaron ata os -9,3º no municipio ourensán de Calvos de Randín e ata os 8,9º en Verín.
No interior da provincia de Lugo, segundo os datos de Meteogalicia, tamén se apoderou o frío de lugares como Ribas de Sil (-5,6º), Bóveda (-5º), Rozas (-4,9º), Sarria (-4,6º) ou Vilalba (-4), fronte aos máis agradables -1,5 de Lugo capital ou os cálidos 4,9º de Burela ou 4,4º do Alto do Poio, en Pedrafita.
No resto de Galicia tamén se deron temperaturas xélidas en zonas do interior da Coruña (Ordes, -5,1º) e de Pontevedra (Lalín, -4,8º). Na estación de Campolongo, en Pontevedra capital, chegouse aos -0.3 graos. Noutros puntos das Rías Baixas, por exemplo Vilanova de Arousa, con 5º, o frío polar non fixo acto de presenza.
As altas presións situadas ao norte da península Ibérica continuarán deixando un tempo seco e estable, con presenza de nubes altas que non impedirán o paso do sol. Ademais, o interior Galicia amencerá con bancos de néboa que se irán disipando co paso das horas. O vento soprará frouxo de compoñente oeste, con algo máis de intensidade no terzo norte.
Non se esperan grandes cambios nin a chegada da choiva polo menos ata a próxima fin de semana.
