Galicia recibe este xoves unha fronte fría pouco activa, coa que a xornada empeza con ceo cuberto e choivas que entran polo oeste. Pola tarde as precipitacións afectarán xa a calquera punto da comunidade, pero terán un carácter illado e ocasional.
Atendendo á información de Meteogalicia, as temperaturas mínimas experimentarán un lixeiro ascenso, mentres que as máximas non terán cambios significativos. Así as cousas, a oscilación térmica da xornada será mínima nalgúns puntos da comunidade, como na Coruña, onde os termómetros se moverán entre os 13 graos previstos de mínima e os 15 de máxima. A variación será bastante maior en Lugo, que estará entre os 4 e os 15 graos.
