O bo tempo e a calor que os dous últimos días levaron a algúns galegos a estrear as praias da comunidade en pleno inverno continuará este martes. O sol volverá brillar e a influencia anticiclónica permanecerá no que resta de semana. As predicións de Meteogalicia anuncian ceos pouco nubrados ou despexados en xeral, aínda que ocasionalmente haberá nubes e claros.
Iso si, aínda que as temperaturas mínimas non terán cambios, as máximas si irán en descenso notable. Deste xeito, os termómetros marcarán este martes catro ou cinco graos menos que este luns, aínda que seguirán rexistrando unha temperatura extraordinariamente alta para un mes de febreiro. Tamén haberá algunha nube máis e algo máis de frío polas noites.
Nas grandes urbes galegas as máximas subirán ata os 20 graos en Vigo e Pontevedra, mentres que os valores mínimos descenderán ata os tres graos en Lugo.
