Zona: D.O. Ribeira Sacra, Amandi. Colleita: 2009. Maridaxe: Solombo de vaca con trompetas dos mortos. Grao: 14,5% vol. Temperatura de consumo aconsellada: 14-16º
Hoxe toca responder o terceiro dos retos que propón o chef Álvaro Villasante desde o restaurante Paprica, que logo dun esmerado entrante a base de foie gras e un primeiro prato de bacallau confeitado, agora ofrece o seu segundo prato: un solombo de vaca con trompetas dos mortos, mousse de queixo de cabra e anchoas do Cantábrico. Para maridar este prato, a elección é un tinto galego que se pode atopar na propia adega do restaurante Paprica, seleccionada polo privilexiado nariz de Mercedes González. O que mellor acompaña a este prato é un monovarietal de mencía, concretamente o Guímaro 2009, un contrastado tinto de Ribeira Sacra elaborado meticulosamente por Pedro Manuel Rodríguez con uvas de viñedos propios.
Cata
De cor vermella picota, de capa media-alta, limpo e brillante.
Ten un nariz agradable e de boa intensidade, destacando unha complexa mestura de froitas vermellas, flores azuis, fermento de panadería e recordo mineral.
