Inés Abril González, do restaurante Maruja Limón de Vigo, resultou vencedora do IX Campionato Galego de Cociñeiros, celebrado no Centro Superior de Hostalería de Galicia (Cshg) e que conta co patrocinio da Dirección Xeral de Turismo da Consellería de Innovación e Industria.
En segundo lugar quedou clasificado Carlos Rodal Fraga, do restaurante Os Abetos, de Nigrán, e terceiro foi Afonso González Pendás, de Casa Pendás, de Sebes-Narón.
Como campioa de Galicia –era, ademais, a única muller dos 10 finalistas–, Inés Abril participará no campionato estatal que terá lugar os próximos días 15 e 16 de abril no marco do "XXII Salón Internacional do Club Gourmets". De aí sairá o aspirante español ao prestixioso certame internacional Bocuse D´or.
Xurado internacional
O xurado desta competición tivo nesta ocasión un carácter marcadamente internacional, xa que formaron parte del especialistas de Estados Unidos e Portugal, ademais dos procedentes de diferentes lugares de España, incluída a representación galega.
Entre os membros do equipo que fallou o premio destacou a presenza de Colette Rossant, columnista de gastronomía do diario norteamericano The New York Times, así como da xaponesa-americana Mini Oka e de varios xornalistas gastronómicos portugueses, con André de Quiroga á cabeza.
Outros compoñentes do xurado foron Mario H. Bueno, experto en cociña internacional e Paz Ivison, actual responsable do Club de Gourmets. A representación galega estivo formada por Manicha Bermúdez, do restaurante Rotilio de Sanxenxo; Maricarmen Durán (do restaurante Nixon da Estrada e membro da asociación Xantar); José Luís Iglesias (do restaurante Cabanas de Lalín e compoñente do colectivo Lareira); Diego Bello e Javier Olleros, campión e subcampión, respectivamente, na anterior edición deste campionato, que ten carácter bianual; Roberto Walther, Xefe do Departamento de Cociña do Cshg e Constantino Iglesias, director do Centro de Formación de Ourense da Confederación de Empresarios de Hostalería de Galicia (Cehosga).
Esta novena edición do campionato contou co respaldo e a presenza do presidente da Federación Española de Hostalería (Fehr), quen presidiu a Mesa Rexedora do certame xunto co titular da patronal hostaleira galega, Juan Silva. Desta mesa tamén formaron parte Xosé Paz Gestoso, director do Cshg e Guillermo Campos, director do campionato.
Inés Abril, do 'Maruja Limón', Campiona Galega de Cociñeiros
