O día 8 de agosto o parque municipal do Carballiño acollerá a 48 edición da "Festa do Polbo" que conta coa declaración de Interese Turístico Nacional e coa presenza asegurada de miles de persoas, sempre máis de 50.000 segundo os organizadores.
Fontes do concello do Carballiño explicaron a GG que en plena crise económica, o papel de adiviño "futbolístico" do polbo alemán Paul, residente nun acuario da cidade de Oberhausen, significou a mellor promoción internacional que nunca tivo a festa, ademais vinculada ao mundial de fútbol gañado por primeira vez pola selección española.
Grazas ao polbo Paul, veciño de Oberhausen
Por esa promoción non programada da vila do Carballiño, o concello decidiu nomear ao cefalópodo alemán "Amigo predilecto" e a certificación do nomeamento será levada persoalmente o día 21 de xullo polo alcalde Carlos Montes ao seu homólogo de Oberhausen, ante a imposibilidade de trasladar ata Ourense ao polbo protagonista.
Grazas ao mosteiro de Oseira, por recibir pagos en polbo seco
Dous días antes de partir de viaxe a Alemaña, Montes, o alcalde de San Cristovo de Cea José Luís Valladares e monxes e abade do mosteiro de Oseira (en Cea), Juan Javier Martín, escenificaron a renovación oficial dos seus vínculos históricos xurdidos no século XII.
O abade recordou que se cumpren 873 anos do nacemento do mosteiro de Oseira, coñecido como "El Escorial galego", situado a máis de 130 quilómetros da costa atlántica e con todo, berce da preparación do "polbo á feira".
Explicou que o cabaleiro Diego Arias decidiu tomar os hábitos en Oseira, cando o mosteiro cumpría os seus primeiros 25 anos, e con esta entrada no cenobio as súas posesións pasaron á abadía de Oseira, entre elas a igrexa de Marín (Pontevedra).
O cabaleiro arrepentiuse da súa decisión e ao cabo de varios anos marchou a Xerusalén e intentou recuperar os seus bens pero un longo litixio terminou por ratificar que Oseira era propietaria da parroquia costeira.
A esta apertura cara ao mar desde o interior, sumouse un privilexio do rei Sancho IV que en 1286 concedeu aos monxes o dereito a organizar unha feira en Cea para poder abastecerse de pan e recadar portazgos e outros impostos e esta actividade comercial e o seu contacto coa costa facilitou a chegada de abundante peixe e polbo seco como pago.
Conexión historico-gastronómica
O alcalde do Carballiño engadiu que a feira de Cea foi substituída anos despois pola do Carballiño, e nesta as veciñas do pobo de Arcos acuñaron o nome de polbo "á feira" para un prato no que o polbo se coce, pícase en rodas e acompáñase con abundante aceite, pementón e cachelos sobre un prato de madeira.
Hoxe, segundo Montes, o polbo "á feira" é o prato galego máis internacional e "non podemos esquecer a súa orixe ao redor deste mosteiro ao que dedicamos a edición da festa de 2010".
A festa quere bater unha marca Guinness
Ademais de estreitar vínculos entre municipios veciños, a festa propiciará este ano novas actividades antes do día 8 de agosto e impulsadas pola recentemente creada "Asociación de amigos da festa do polbo", por hostaleiros e polbeiros da vila, entre eles Manuel Pereira.
Pereira explicou que como primeira actividade do colectivo, o día 3 pola tarde, a praza maior será o escenario no que se intentará bater a marca "Guinness" do prato de polbo de maior tamaño, que nestes momentos está en mans da empresa lucense Pulpalia que conseguiu encher de polbo un prato de 2,05 metros na festa do Marisco de Alcobendas (Madrid), celebrada en maio de 2009.
Os candidatos do Carballiño teñen xa un prato de 2,25 metros de diámetro que prevén encher de polbo "sen patacas, que era o que máis había no de Alcobendas", engadiu.
Para iso contan con máis de 70 quilogramos de polbo e 15 litros de aceite que logo se repartirán entre os curiosos que asistan ao "dolo", ao que tamén irá un notario que levantará acta das medidas e condicións do prato de polbo.
Máis festa
Entre outras actividades novas previstas para este ano, segundo Pereira, estará un concerto na noite do día 5 de agosto e o primeiro encontro de penas do polbo do Carballiño que será nunha carpa instalada na Praza das Monxas para a cea do día 6 de agosto.
