Entre as 94 adegas da Ribeira Sacra dos ríos Miño e Sil, as máis próximas ao embarcadoiro lucense de Abeleda sofren este ano as consecuencias da baixada da canle, provocada por obras de Iberdrola na presa de Santo Estevo.
En torno ao río Sil
Estas adegas, algunhas con restaurante propio, non poden contar durante 2010 coa chegada de turistas e enoturistas procedentes do río Sil pois a navegación é imposible na cola do encoro, xusto no tramo percorrido ata este ano polo catamarán da Deputación de Lugo.
Outros dous catamaráns seguen activos augas abaixo, na zona máis próxima á presa de Santo Estevo, con embarcadoiro en Loureiro (Ourense) e seguen navegando catro veces ao día con turistas que queren comprobar desde a auga, por 14 euros que custa a viaxe, a xustificación monumental do nome Ribeira Sacra e a existencia desa "viticultura heroica" practicada en viñedos que parecen pendurados nas ladeiras do canón.
Segundo datos da Deputación de Lugo, a perda de visitantes pola paralización do terceiro catamarán estímase en 25.000 persoas, que foron os turistas que subiron o barco durante o ano 2009 e poderá compensarse, só en parte, co recentemente inaugurado Tren Galaico Expreso Ribeira Sacra, que ata o día 19 de setembro, cada sábado e domingo, levará desde Ourense a Monforte e ao revés, a un máximo de 200 persoas por día.
O chamado "Viñobús", implantado polo Consorcio de Turismo da Ribeira Sacra con guía e custo de 6 euros por persoa, repite este ano as súas pequenas rutas por adegas, Centro do viño en Monforte de Lemos e centro oleiro de Gundivós, cada sábado e domingo dos meses de xullo e agosto.
En torno ao viño
O propietario da Adega Algueira, Fernando González, explicou a GG que só a paixón pola viticultura motiva aos empresarios instalados na Ribeira Sacra para producir viños únicos e para "vender Ribeira Sacra como conxunto de paisaxe, patrimonio e viño, sen localismos, animando aos nosos visitantes a que repitan en todas as estacións do ano e mostrándolles traballos tan peculiares como a creación dun viñedo en socalcos, que é algo que se fai moi poucas veces".
O maior número das persoas que chegan a Algueira, en Doade, e outras adegas próximas, fano en coches particulares polo seu coñecemento previo da zona, os de Francia pola publicación dunha reportaxe no suplemento de "Le Figaró" e outros polo "boca a boca".
González e a súa esposa Ana Pérez levan 30 anos apostando polos viños dos seus 11 hectáreas de viñedo nas que envellecen 66.000 cepas repartidas en socalcos comunicados por 6 montacargas de 150 metros cada un que fan posible o transporte de ferramentas e uvas no canón do Sil.
Empezaron construíndo os viñedos, logo a adega, o restaurante O Castelo e a partir de agora un futuro que quere ser innovador a base de manter traballos tradicionais únicos e de implicarse en investigacións como a que desenvolven as universidades de Santiago de Compostela e Castela A Mancha para utilizar a madeira do "carballo" nas barricas de crianza.
González lembrou que catro dos seus viños obtiveron máis de 90 puntos nas catas do estadounidense Parker "e isto só é posible polo noso empeño en humanizar os viños e facelos tan únicos como o somos as propias persoas", agregou.
Esa diferenciación pasou tamén por ser o primeiro, xunto con José Luís Mateo do D.O. Monterrei, en recuperar a variedade autóctona de uva "merenzao" e por manter a tradición de pisar cos pés as uvas destinadas a viño de crianza.
Ana Pérez explicou que esta práctica non é "unha pouse" para os vídeos que mostran aos seus visitantes senón unha forma de facer "o traballo como xa non o fai ninguén e tendo en conta que as despalilladoras mecánicas machucan a uva, mentres que os pés acaríñana e o resultado é diferente".
Deses traballos diferenciadores, Fernando e Ana obteñen 70.000 botellas de viño, das que 22.000 son de crianza comercializadas como "Algueira Lousa", e destas, 14.000 quedan en Galicia e o resto forma parte das cartas dos restaurantes máis coñecidos de España.
Primeiro crianza en barrica de carballo.
Unha sala da adega está destinada á crianza ou " maridaxe entre viño e madeira" segundo González, na que hai deceas de pipas de carballo francés e duas únicas de carballo galaico que conteñen 500 litros de viño desde hai mes e medio.
Cando pasen cinco meses máis, o coordinador do primeiro estudo sobre o uso do carballo para as pipas de crianza Ignacio Díaz Maroto, comprobará nesas dúas barricas o resultado do contacto entre madeira autóctona e viño e noutras dúas custodiadas na adega experimental do consello regulador da veciña comarca vitícola de Valdeorras.
"Se o resultado é bo, suporía un revulsivo para a riqueza forestal galega xa que a madeira do carballo pasaría a ter un valor engadido que o faría moi rendible para usar as súas táboas na construción de barricas", agregou González.
Do Viñobús á ruta do viño de Galicia e norte de Portugal
A Adega Algueira é unha das que reciben este verán aos enoturistas que utilizan o "Viñobús" fretado polo Consorcio de Turismo da comarca pero González xa se considera preparado para integrarse na futura Ruta do Viño de Galicia e norte de Portugal na que os visitantes poderán coñecer os viños e riqueza paisaxística e patrimonial das cinco comarcas galegas con denominación de orixe e outras 3 ó 4 do país veciño.
