Manuel López Valencia, cociñeiro do restaurante Voar
Boa materia prima e un punto de creatividade. Esa é a fórmula utilizada polo restaurante Voar de Ribadeo para satisfacer á súa clientela. é unha cociña saborosa e contundente, que engade á súa carta os produtos de tempada. Chegado o outono cobrarán protagonismo os cogomelos, con pratos como o carpaccio de boletus con aceite trufado, ovos escalfados en puré de fungos ou a cazola de cogomelos, con distintas variedades. A oferta micolóxica dependerá do mercado, polo que non se inclúen na carta.
Dentro da oferta habitual destaca un prato que goza de gran popularidade: as patacas á importancia con ameixas e polbo. O tubérculo preséntase confeitado e lixeiramente rebozado en ovo, acompañado de ameixas en salsa verde e polbo. Ante a contundencia e abundancia da proposta pódese dicir que son dúas racións nunha. Non hai que esquecer outras opcións, como os chipiróns con arroz cremoso ou as croquetas de xamón ao cabrales.
Manuel López Valencia, o cociñeiro do Voar, ten unha man excelente cos arroces. O caldoso de mariscos é unha exquisitez. Inclúe nécora, ameixa, lagostino e bogavante. O restaurante conta tamén co seu propio acuario, cos mariscos vivos, o que sempre induce á confianza no produto. A parrillada de marisco ou a fonte de mariscos cocidos teñen moito tirón. Tamén chama a atención o caldoso con berberechos ou o arroz negro, con luras na súa tinta.
A parrillada de peixes ou de carnes constitúe un bo segundo, sobre todo para compartir, aínda que os clásicos sempre nos agarramos á pescada, que sempre foi o patrón ouro dos peixes. Hai que aproveitar o seu prezo alcanzable fronte a outros peixes como a palometa vermella ou o besugo, considerados de alta e que tamén se inclúen na oferta. No Voar saben manexar a pescada. Preparan o seu lombo á prancha, cun puré de ajada moi logrado. Sérvena tamén á galega. Outra modalidade é ao pil pil, gratinada ao forno no seu propio mollo, que ten moita saída nos banquetes.
A parrillada da carne leva costela, solombo, secreto, chourizo e morcilla Matachana, que se come fóra da tripa, unha opción con raizame na gastronomía asturiana e leonesa. A paletilla de lechal ao forno, o entrecot de vaca, o solombo de tenreira ou as carrilleras de ibérico ao tinto son outras interesantes suxestións.
Á hora das sobremesas levan a palma o touciño de ceo, o flan de queixo, os canutillos de crema, o requeixo con mel ou galleta de noz ou o coulant de chocolate con xeado de mandarina son outras delicias que chaman a atención. A repostería do local é tradicional e caseira, aínda que sempre deixa a porta aberta a algunha novidade.
O restaurante deste histórico hotel ribadense reabriu as súas portas en 2011 da man dos seus actuais xerentes. Manuel López Valencia esfórzase por convertelo nun referente e para iso bota man tamén das xornadas gastronómicas. O ano pasado inclinouse por render homenaxe á cociña vasca e agora baralla tamén algunha iniciativa especial, que se salga das tradicionais convocatorias destinadas a exaltar un só produto.
Este restaurante, situado nunha das rotondas de acceso a Ribadeo, volve brillar con luz propia.
