A Feira da Androlla de Navia de Suarna celebrou onte os seus vinte e cinco anos de idade, un cuarto de século no que soubo afianzarse no calendario deste tipo de citas gastronómicas como a mostra máis veterana de toda A Montaña lucense. A tradición de exaltar por estas datas un dos produtos máis representativos da zona está xa moi asentada, especialmente na comarca, o que permitiu que o aniversario da feira cumprise coas expectativas de público a pesar dunha meteoroloxía adversa. Estivo a chover durante toda a xornada, aínda que non facía moito frío, pero, ademais, os temporais de neve que se rexistraron na zona durante as últimas semanas reduciron sensiblemente o número de foráneos que se trasladou ata Navia de Suarna.
En calquera caso, a praza principal da vila estivo moi animada durante a xornada. Alí instaláronse unha trintena de postos, nos que se puxeron á venda 6.000 quilos de androlla, pero tamén case todos os outros produtos que son necesarios para facer un bo cocido, típico destas datas do ano. Ademais, nesta zona, onde como é habitual habilitouse unha gran carpa, atopábanse postos doutros artigos de alimentación, desde mel a doces, pasando por licores.
A feira completábase con postos de artesanía, téxtil e calzado, que se instalaron nas rúas que desembocan na praza da vila, así como varias pulperías.
Á unha da tarde, iniciouse a degustación gratuíta de androlla, na que se distribuíron 200 quilos en pequenas racións, preparadas polo Mesón O Pedregal. O seu responsable destacaba que para a preparación deste volume de androlla,"o segredo reside en xuntar moito as pezas para que non rompan durante a cocción, que, como mínimo, ten que durar dúas horas e facerse a fogo lento".
Á feira acudiu un numeroso grupo de políticos do PSOE, co presidente da Deputación, José Ramón Gómez Besteiro, á cabeza e do PP, entre eles o secretario do Parlamento e do partido en Lugo, José Manuel Balseiro, e o subdelegado do Goberno, Ramón Carballo.
