A Feira do Capón de Vilalba porá á venda o domingo 1.200 exemplares

A tradicional Feira do Capón de Vilalba regresa este domingo, día 18, á Praza da Constitución da capital chairega para pór á venda baixo unha gran carpa ao redor de 1.200 exemplares desta ave típica da época do Nadal. Uns 60 criadores e criadoras concorrerán a esta cita, na que se espera que os prezos se manteñan, como nos últimos anos, entre os 80 e os 100 euros por unidade.

Os produtores de capón criaron este ano uns 1.800, pero moitos deles xa non chegarán á feira porque se venden antes nas granxas vilalbesas. ''Á feira veñen menos porque moita xente ten apalabrados os capóns dun ano para ou outro, ou cal tamén é positivo, porque vese un interese por parte da xente'', explicou Gonzalo Hermida, xerente da asociación de criadores.

O alcalde vilalbés, Gerardo Criado, manifestou que esta feira é ''transcendental'' para Vilalba e destacou o traballo feito ao longo dos últimos anos para que o capón ''se adapte ós cambios sociais'', se mellore coa homogeneización da calidade e amplíe mercados coa desestacionalización do produto.

Criado tamén afirmou que, como vén sendo tradicional, o Concello regalará un par de capóns «ós dous fillos predilectos» da localidade, Manuel Fraga e Antonio María Rouco Varela, ademais da o último pregoeiro das festas de San Ramón, Xosé Luis Regueira. A todos eles únese este ano Mariano Rajoy, como presidente do Goberno electo. ''Sabemos que polo Nadal se consome nun restaurante de Pontevedra'', explicou Gerardo Criado.

Programa
A entrada de capóns no recinto feiral realizarase entre as 8.00 e as 9.00 horas. A apertura da feira ao público será ás 10.00 horas e sobre as 12.30 procederase á entrega de premios ao mellor criador, mellor cesta e mellor par.

Haberá animación musical a cargo do grupo de gaitas local Entre Lusco e Fusco e da Charanga de Vilalba. O orzamento da Feira do Capón para este ano rolda os 20.000 euros.