A Festa do Queixo de Arzúa espera reunir entre o 28 de febreiro e o 2 de marzo a miles de persoas nunha edición -o número 39-, que contará con máis queixerías e, entre outras novidades, incluirá a preparación de pratos en directo, a cargo dos restauradores lucenses Álvaro Villasante, do Paprica, e Héctor López, do España.
Presentaron onte o programa festivo o alcalde arzuán, José Luís García; o responsable do concurso musical Queixo Maquetón, José Ramón Bernárdez; o presidente do consello regulador da denominación de orixe Arzúa-Ulloa, Xosé Luís Carrera; e o director da produtora do Festival do Queixo, Alberto Alfonso.
Segundo explicaron, os actos festivos arrincarán o día 28 coa celebración do oitavo Concurso de Tapas e Petiscos, organizado polo consello regulador da denominación Arzúa-Ulloa.
O certame, que se desenvolverá entre as 18.00 e as 23.30 horas, contará coa participación de 18 locais e premiarase a calidade, orixinalidade e presentación dos pratos.
O recinto feiral Terra do Queixo abrirá as portas o sábado 1, ás once da mañá, co queixo Arzúa-Ulloa como protagonista, aínda que tamén se poderán adquirir pezas das outras denominacións de orixe galegas. Tamén haberá unha mostra de queixos doutras comunidades autónomas e máis produtos alimentarios.
A inauguración oficial da feira será ese día, ás 13.30 horas, cun pregón a cargo da triatleta Diana Cotón, os futbolistas Diego Quintela e Pablo Insua, o nadador Óscar Pereiro e o atleta Lolo Penas, todos eles naturais de Arzúa,
Ata que bote o peche -o día 2, ás 19.00 horas-, o recinto feiral acollerá tamén distintas actividades para todos os públicos.
Entre outras propostas, o sábado pola mañá haberá pasacalles co grupo de gaitas Casto Curbín, un taller de caretas tradicionais e un espectáculo de maxia. Xa pola tarde, haberá un espectáculo de karaoke en galego para os máis pequenos e outra actuación rueira, da charanga DXT.
Polo que se refire ao domingo, a exhibición dos cociñeiros lucenses será a partir das 12.30 horas e pola tarde haberá talleres de repostería creativa para nenos e adultos, ademais de pasacalles do Bringuelo e As Sobreiras do Ulla.
Durante os dous días, no recinto haberá un ‘photocall' no que os visitantes poderán mostrar o seu apoio á festa.
CONCERTOS
No cartel do Festival do Queixo, outro dos atractivos desta festa, un dos pratos fortes será o concerto de Arizona Baby, o sábado ás 21.30 horas no campo da feira. Tamén actuarán O Adhesivo, The Winning Numbers e Eme DJ.
O domingo, na praza de Galicia haberá concertos de Tanto nos Tén e Leilía, ás 18.00 e 19.30 horas, respectivamente.
