A Festa do Polbo do Carballiño, que celebrou este domingo a súa edición número 46, optará á declaración de Festa de Interese Turístico Internacional co apoio do Goberno de España, segundo dixo hoxe a ministra de Medio Ambiente, Rural e Mariño, Elena Espinosa.
Espinosa participou hoxe na Festa do Polbo xunto con outras autoridades como o presidente da Xunta de Galicia, Emilio Pérez Touriño; o vicepresidente primeiro da Xunta de Andalucía, Gaspar Zarrías; tres conselleiros galegos e a presidenta do Parlamento de Galicia, Dolores Villarino.
Espinosa xustificou ese apoio en que a Festa do Polbo baséase nun produto "puramente galego" desde a Idade Media na que os propietarios feudais das terras da costa recibían como pago o polbo pescado no océano, e recordou que os veciños das parroquias de San Xoán e Santa María de Arcos desenvolveron e mantiveron o comercio do cefalópodo e especializáronse na súa preparación.
Esta festa, segundo a ministra, está entre as máis importantes de España pola cantidade de persoas que concentra, e recordou que sempre roldan as 70.000, "algo que en Madrid non sería moito pero aquí si, porque se celebra nunha vila de 13.000 habitantes que desenvolveu toda a súa capacidade para facer fronte a esta celebración", agregou.
As 'pulpeiras', embaixadoras galegas
En relación á vinculación tradicional do Carballiño co polbo, o presidente da Xunta dixo no seu discurso nunha recepción oficial, que as "pulpeiras" son as mellores embaixadoras de Galicia en todo o mundo, "como comprobamos cada vez que viaxamos por Arxentina, Uruguai, Alemaña e outros países aos que emigraron".
O alcalde do Carballiño, Carlos Montes, interveu para recordar que a Festa do Polbo sempre é punto de reencontro para emigrantes que acoden á vila durante as súas vacacións, veciños, peñas e afeccionados do resto de Galicia e España.
"Todo iso fai que O Carballiño sexa hoxe a capital de Galicia porque na festa concéntranse 70.000 persoas e o que nos enche de especial orgullo é que tamén se celebra, de forma simultánea, noutras capitais do mundo como Buenos Aires", engadiu.
A Festa do Polbo do Carballiño foi declarada Festa de Interese Turístico Nacional no ano 1992 e agora optará á declaración internacional, de carácter honorífico e que inclúe, entre os seus requisitos, antigüidade, continuidade no tempo, arraigamento na localidade, orixinalidade e diversidade de actos e contar co acordo plenario para a petición.
Tamén se require ter a declaración de nacional, coa que xa conta a do Carballiño, e lugares suficientes de aloxamento nun radio non superior aos 50 quilómetros desde o lugar da festa, segundo a orde que regula este tipo de procesos, de maio de 2006.
En Galicia so foron distinguidas polo de agora como "de Interese Turístico Internacional" as festas do Apóstolo de Santiago, a Romaría Vikinga de Catoira, o Festival Celta de Ortigueira e a Rapa das Bestas de Sabucedo, na Estrada.
A Festa do Polbo do Carballiño aspira a ser de Interese Turístico Internacional
