Os fondos recadados na XVI Festa do Percebe do Roncudo, que se celebra o vindeiro sábado, día 12 de xullo, en Corme (municipio coruñés de Ponteceso) destinaranse a "reflotar a confraría de pescadores”, segundo os organizadores.
A ración de percebes (que superará os 300 gramos) venderase a 15 euros. A organización destaca que é o mesmo prezo que na pasada edición, “con máis cantidade e mellor calidade”.
Os interesados na compra deste marisco, tanto particulares como empresas, poderán facelo a partir de hoxe mércores na lonxa nova de Corme, desde as sete da tarde. Para máis información, poden chamar ao teléfono 655 962 539.
Aparcadoiro e carpa
O día da festa habilitarase unha zona de aparcadoiro no porto, así como unha carpa para a degustación do propio percebe e doutros produtos, como o polbo ou a empanada, “por se o tempo non quixese comportarse”. Ademais, haberá unha cantina na Praza da Ribeira, que tamén servirá para recadar fondos con destino á confraría.
O pregoeiro desta décimo sexta edición será Jacinto Parga, presidente de Portos de Galicia.
