Logo de catar 61 marcas de Rías Baixas en dous días, os profesionais que integraron o panel de cata da XXI Cata Concurso Rías Baixas Albariño decidiron que os premios desta edición recaesen a medalla de ouro na marca Lagar de Costa, da adega Dores Fontán; a medalla de prata nas Rías Baixas Albariño de Pazo Pondal, Adegas Pazo Pondal e; a medalla de bronce en Señorío de Rubiós, da adega Coto Redondo.
Tras a entrega dos galardóns aos premiados durante a comida de confraternidade da LVII edición da Festa do Albariño en Cambados; os xornalistas, enólogos e catadores, que integraron o panel de cata do concurso durante esta edición, coincidiron en sinalar o bo nivel dos finalistas. Para o xurado a cualificación da anada 2008 como boa foi acertada por parte do pleno do Consello Regulador. Os catadores coincidiron en sinalar que os doce viños que protagonizaron a Cata Derradeira contaban cunha calidade homoxénea, todos eles. Pola súa banda, David Barco, presidente da Asociación de Catadoras de Galicia, describiu a estes viños: “con moita intensidade froiteira, ademais notábase o carácter varietal do albariño nos finalistas”.
Foron moitos os visitantes, que a media tarde se achegaron polo Paseo da Calzada, para degustar, antes de que a festa tocase ao seu fin, as Rías Baixas Albariño e, en especial as marcas galardoadas nas corenta casetas, ocupadas polas 43 adegas participantes nesta edición. A organización estima que durante esta edición da Festa do Albariño pasaron unhas 250.000 persoas polo Paseo da Calzada para degustar os viños da anada 2008 e que no recinto das casetas vendéronse 60.000 botellas, así como 18.000 catavinos.
Lagar de Costa faise coa medalla de ouro da XXI cata concurso Rías Baixas Albariño de Cambados
