A quinta edición do concurso Cume Tapas de Monforte está no seu ecuador e os organizadores, a delegación da Asociación Provincial de Hostaleiros, consideran que hai posibilidades de que se superen os datos do ano pasado cando se venderon 26.893 tapas. A xerente do colectivo, Beatriz Vila, cre que o feito de que este ano se unificasen os prezos e as propostas dos 32 establecementos participantes véndanse a un euro motiva máis ao consumidor. «Igual é un pouco ousado facer esa previsión nun contexto de crise, pero se o fin de semana próximo se comporta como este hai posibilidades de superar as vendas do ano pasado», asegurou Vila.
Onte, a xerente acompañou ao xurado profesional por diversos locais para que probasen as propostas. Este xurado será o encargado de elixir a mellor tapa tradicional, a máis creativa, a que mellor maridaxe presente cos viños da Ribeira Sacra e a que mellor empregue os queixos Marqués de Cernadas.
Como en anos anteriores a comitiva está presidida por Quique Rodríguez, do restaurante madrileño Villa Magna, pero os outros integrantes son novos. Están o catador chantadino Bruno Lobelle, o restaurador coruñés Francisco Jiménez e a blogueira gastronómica e cociñeira Mariam Rodríguez.
Quique Rodríguez, presidente do xurado técnico, mostrábase onte sorprendido pola calidade dos pratos presentados. Destacou que os hostaleiros experimentan máis cada ano e que melloran o sabor e a presentación. «Atopamos produtos que outros anos ninguén os elixía para facer unha tapa, a competencia é cada vez máis dura e as propostas están cada vez máis traballadas», dixo.
O concurso de tapas prolongarase ata o vindeiro domingo. Os consumidores integrarán outro xurado, o popular, e terán dereito a voto sempre que proben un mínimo de seis tapas e así o acrediten cos selos dos establecementos. Pero aqueles que proben as 32 propostas poderán entrar nun sorteo de tres viaxes, dúas para parellas e un para unha familia completa.
Este ano exerce de madriña do certame monfortino a actriz de televisión Ana Santos. Estivo na presentación do evento o pasado 3 de maio e a previsión é que regrese para a entrega de premios, cuxo acto oficial se fai no verán.
