O tempo estable predominará este mércores na maior parte do país. Galicia continuará durante a xornada baixo o predominio das altas presións, polo que se esperan ceos despexados ou con algún intervalo de nubes altas.
As temperaturas experimentarán un ascenso entre lixeiro e moderado, máis acusado na metade sur da comunidade. Os ventos soprarán de compoñente norte, frouxos en xeral, moderados no litoral atlántico.
Así, os termómetros nas grandes cidades alcanzarán os 29 graos en Ourense, os 25 en Pontevedra, os 24 en Vigo e os 22 en Lugo ou Santiago. En canto aos valores mínimos, na capital lucense rexistraranse os sete graos no momento máis frío do día e en Ferrol os oito, mentres que na Coruña ou na Boa Vila o mercurio non caerá por baixo dos 11 graos.
