Miles de persoas concentráronse na tarde deste luns en diversos municipios de Galicia para clamar contra a "incompetencia" da Xunta na xestión dos incendios que este fin de semana arrasaron a comunidade e que se cobraron a vida de catro persoas.
Na capital galega, varios milleiros de persoas manifestáronse en contra da política forestal da Xunta nunha manifestación na que participaron representantes políticos de todos os partidos da oposición.
Durante o percorrido, os manifestantes portaron pancartas contra a Xunta e tamén contra a empresa pasteira Ence
Dirixentes como o alcalde de Santiago, Martiño Noriega, o líder de En Marea, Luís Villares, o secretario xeral do PSdeG, Gonzalo Caballero, e o nacionalistas Rubén Cela e Goretti Sanmartín percorreron unha das principais rúas do centro da cidade e da zona vella para finalizar na praza da Quintana.
Os cánticos da protesta en Compostela estiveron dirixidos á "incompetencia" da Xunta e subliñaron que "un goberno que improvisa é un terrorista".
En numerosas ocasións pediron a dimisión do presidente da Xunta, Alberto Núñez Feijóo, e incidiron en reclamar un novo modelo de xestión dos montes porque ter un "rural abandonado é un incendio asegurado".
Durante o percorrido, os manifestantes portaron pancartas contra a Xunta e tamén contra a empresa pasteira Ence, que ten unha factoría na ría de Pontevedra.
En Vigo, unhas 3.000 persoas concentráronse ante o MARCO e corearon cánticos nos que pediron a dimisión de Alberto Núñez Feijóo, clamaron contra "os recortes do PP" e mostraron a súa solidariedade con Asturias e Portugal, do mesmo xeito que Galicia azoutadas polos incendios.
Participaron nesta concentración a portavoz nacional do BNG, Ana Pontón, a deputada no Congreso de En Marea Alexandra Fernández e o secretario xeral de CCOO en Galicia, Ramón Sarmiento, entre outros.
Ana Pontón xustificou a súa presenza en que sente "indignada, como miles de galegos, ao ver como arde o monte", e considerou que chegou o momento de "reclamar responsabilidades e un cambio de rumbo" nas políticas contra os incendios forestais.
En Ourense, máis dun milleiro de persoas participaron nunha concentración na que o comité de defensa do monte galego leu, ante a delegación territorial da Xunta, un manifesto no que alertaban sobre as consecuencias económicas e sociais que terán os incendios desta fin de semana.
Tamén esixiron un "novo plan de xestión para o monte" e máis medios técnicos e humanos para facer fronte a posibles situacións deste tipo.
Durante esta manifestación víronse pancartas nas que se podía ler "o noso corazón arde contigo" ou "non hai perdón".
Tamén houbo concentracións no resto das cidades de Galicia e nos municipios pontevedreses de Cangas do Morrazo, Cambados e Lalín, nas localidades ourensás do Carballiño, Ribadavia e O Barco de Valdeorras; nas Pontes, Rianxo, Ribeira, Carballo e Betanzos, na provincia da Coruña, e en Monforte de Lemos, na provincia lucense, entre outros.
Fóra de Galicia, en cidades como Madrid e Barcelona tamén se realizaron sendas convocatorias en repulsa aos incendios forestais que queiman Galicia.
