As nubes irán en aumento este mércores a medida que avance a mañá debido á chegada dunha fronte fría. A partir do mediodía empezarán as choivas polo oeste que se irán estendendo progresivamente ao resto do territorio. Nas últimas horas poderían estar acompañadas de aparello eléctrico.
Segundo a información publicada por Meteogalicia, dependente da Consellería de Medio Ambiente, o vento soprará moderado con intervalos fortes nas zonas de montaña e na Costa da Morte, diminuíndo a partir do mediodía.
Pola súa banda, as temperaturas mínimas experimentarán un ascenso, mentres que as máximas caerán lixeiramente. Deste xeito, nas cidades galegas as máximas subirán ata os 22 graos en Ourense, os 21 na Coruña e os 19 en Lugo, Pontevedra ou Santiago.
No outro lado da balanza, os valores mínimos descenderán ata os oito graos na cidade da muralla e ata os 11 en Ferrol ou a Boa Vila.
