As previsións meteorolóxicas apuntan a que a estabilidade irá en aumento neste sábado, xa que as altas presións se situarán de novo ao norte da península Ibérica. Así, empezará o día con nubes baixas e néboas que irán desaparecendo a medida que avance a mañá. A partir do mediodía o ceo estará en xeral pouco nubrado ou despexado, excepto nalgúns puntos do interior, onde as néboas serán particularmente persistentes.
Atendendo á información de Meteogalicia, o vento soprará moi frouxo de compoñente leste e as temperaturas mínimas descenderán lixeiramente, mentres que as máximas non terán cambios significativos. Lugo terá a mínima e a máxima máis baixa da Galicia urbana, porque os seus termómetros se moverán entre un grao e nove. Pontevedra, mentres, terá as máis altas: entre os 6 e os 15 graos.
